Samsung Electronics ընկերության օպերացիոն շահույթը 2012-ի երկրորդ եռամսյակում հասել է 5,9 միլիարդ դոլարի՝ ավելանալով 79 տոկոսով անցած տարվա նույն ժամանակահատվածի համեմատ: Այդ ընթացքում ընկերության եկամուտը կազմել է 41 միլիարդ դոլար:
Բջջային սարքերի արտադրության ստորաբաժանումը Samsung-ին բերել է 4 միլիարդ դոլար կամ օպերացիոն շահույթի 65 տոկոսը: Այս մասին հաղորդում է «Վեստի Էկոնոմիկան»:
Այս տարվա երկրորդ եռամսյակում կորպորացիան կարողացել է կրկնապատկել այս բաժանմունքից ստացված շահույթը: Սրան զուգահեռ` ընկերությունը հիշողության չիպերի արտադրության ոլորտում եկամտի անկում է գրանցել:
Փոքր-ինչ բարելավվել են հեռուստացույցների արտադրության բաժանմունքի ցուցանիշները: Ընկերությունը թարմացրել է մոդելային շարքն ու վաճառքի հանել 3D գործառույթով և ինտերնետին միանալու հնարավորությամբ արտադրանք:
Վերլուծաբանների կարծիքով՝ երկրորդ եռամսյակում Samsung-ի հաջող ցուցանիշների հիմնական գործոնը եղել է Galaxy սմարթֆոնների վաճառքը: Մայիսին ընկերությունը սկսել էր Galaxy S III վաճառքը, որը համարվում է Apple-ի iPhone-ի մրցակիցը: Samsung-ը ծրագրում է մինչև հուլիսի վերջ վաճառել 10 միլիոն Galaxy S III՝ սահմանելով այդ շարքի սմարթֆոնների իրացման արագության հերթական ռեկորդը:
HI Investment & Securities վերլուծական ընկերության տվյալներով՝ Samsung-ը մինչև հունիսի վերջ իրացրել էր 7 միլիոն սմարթֆոն, նույնիսկ բախվել պահեստամասերի դեֆիցիտի, ինչի հետևանքով ստիպված է եղել կրճատել սարքերի արտադրությունը:
Այս ֆինանսական հաշվետվությունն առաջինն է նոր գլխավոր տնօրեն Քվոն Օ Հյունի համար, որը ընկերությունը սկսել է ղեկավարել հունիսից:
