Հասարակական հսկիչ Ջորջ Ցիմերմանը, որը մեղադրվում է սևամորթ դեռահաս Թրեյվոն Մարտինին սպանելու մեջ, գրավի դիմաց ազատ է արձակվել: Այս մասին հաղորդում է Associated Press-ը:
Ցիմերմանը բանտից դուրս է եկել դատավոր Քենեթ Լեստերի կողմից գրավի չափը մինչև մեկ միլիոն դոլար բարձրացնելու որոշումից մի քանի օր հետո: Ցիմերմանը պետք է էլեկտրոնային թևնոց կրի, նա իրավունք չունի բանկում հաշիվ բացել, անձնագիր պահել մոտը և մոտենալ օդանավակայանին:
Ապրիլին Ցիմերմանը 150 հազար դոլար գրավի դիմաց արդեն ազատություն էր ստացել: Սակայն հետագայում դատախազները հայտարարել էին, որ հսկիչը և նրա կինը դատարանին թյուրիմացության մեջ են գցել` իրենց եկամուտների իրական չափի վերաբերյալ: Մասնավորապես, ամուսինները թաքցրել են դատարանից, որ Ցիմերմանին օգնելու համար 135 հազար դոլարի նվիրատվություն է հավաքվել:
Ցիմերմանին երկրորդ կարգի սպանության պաշտոնական մեղադրանքները ներկայացվել են ապրիլի 12-ին: Հսկիչը, սակայն, իրեն մեղավոր չի ճանաչում:
