Ադրբեջանական Trend լրատվական գործակալության փոխանցմամբ՝ Բաղդադը պատժամիջոցներ է սահմանելու թուրքական այն ընկերությունների դեմ, որոնք նավթագազային համաձայնագրեր կստորագրեն Հյուսիսային Իրաքի քրդական ինքնավարության հետ՝ առանց Իրաքի կենտրոնական կառավարության համապատասխան թույլտվության: Այս մասին հայտարարել է Իրաքի նավթարդյունաբերության նախարարության պաշտոնական ներկայացուցիչ Ասիմ Ջիհադը.
«Այս հարցում Բաղդադի դիրքորոշումը պարզ է: Քրդական ինքնավարության հետ յուրաքանչյուր նավթագազային համաձայնագիր կբոյկոտվի կենտրոնական կառավարության կողմից: Իրաքը բարձր է գնահատում Թուրքիայի հետ համագործակցությունը, ինչը մասնավորապես վերաբերում է էներգետիկ ոլորտին:
Դրա համար էլ կենտրոնական կառավարությունը հուսով է, որ Թուրքիան առանց պաշտոնական Բաղդադի թույլտվության չի սկսի համագործակցել քրդական ինքնավարության հետ: Այդպիսի համագործակցությունը կլինի ապօրինի: Այն վնաս կհասցնի Իրաքի նավթագազային սեկտորի վերաբերյալ օրինագծի ընդունման գործընթացին»:
Հիշեցնենք, որ Հյուսիսային Իրաքի քրդական ինքնավարության նավթային պաշարները կազմում են 45 միլիարդ բարել: Հյուսիսային Իրաքի քրդական ինքնավարությունում նավթի օրական արդյունահանումը հասել է 300,000 բարելի: Քրդական ինքնավարության էներգետիկայի նախարար Աշթի Հևրանին ոչ վաղ անցյալում հայտարարեց, որ իրենք մտադիր են ավելացնել գազի արդյունահանումը և 18 ամիս անց կարող են սկսել գազի արտահանում:
Ներկայումս Թուրքիան ձգտում է օգտվել Իրաքի կենտրոնական կառավարության ու Հյուսիսային Իրաքի քրդական ինքնավարության միջև առկա տարաձայնություններից և սկսել ավտոցիստեռներով ներկրել «քրդական նավթ»: Սկզբնական փուլում Թուրքիան նախատեսում է Հյուսիսային Իրաքից օրական ներկրել 15,000 բարել նավթ: Սակայն Թուրքիան չի պատրաստվում սահմանափակվել միայն այդքանով. նա անգամ պլանավորել է մինչև 2013 թվականը նոր նավթամուղ կառուցել դեպի Հյուսիսային Իրաք:
