Windows 8 օպերացիոն համակարգի եզրափակիչ տարբերակում գաջեթները՝ հավելվածների պատուհանները, կբացակայեն: Դրանք սովորաբար տեղակայված են լինում համակարգչի աշխատանքային սեղանի վրա և ապահովում են ինֆորմացիայի արագ հասանելիությունը: Այս մասին գրում է The Verge բլոգը:
Օպերացիոն համակարգի նախնական տարբերակներում, այդ թվում Release Preview-ում, գաջեթները իրենց տեղում են:
Այս առնչությամբ Microsoft-ը պաշտոնական մեկնաբանություն չի արել: Չի բացառվում, որ ընկերությունը որոշել է Windows 8-ից գաջեթները հեռացնել՝ կապված այն բանի հետ, որ դրանց գործառույթը մասամբ իրենց վրա են վերցրել Metro ինտերֆեյսի հավելվածները:
Windows 8-ից կանհետանան օգտատերերի համար սովորական դարձած մի շարք տարրեր ևս, այդ թվում` Start կոճակը (որը դարձել է Windows-ի այցեքարտը) և Aero Glass գրաֆիկական էֆեկտները: Վերջին երկու գործառույթների բացակայությունը պաշտոնապես հաստատված է: Windows 8-ը կթողարկվի այս տարեվերջին:
