Այն, որ Մուբարաքի խոսքն ավելի շատ հարցեր առաջացրեց, քան պատասխաններ տվեց, վկայում են Եգիպտոսի նախագահի ուղերձից հետո համաշխարհային որոշ առաջնորդների արած հայտարարությունները:
«Եգիպտոսի ժողովրդին ասացին, որ տեղի է ունեցել իշխանության փոխանցում: Սակայն այդպես էլ պարզ չդարձավ, արդյո՞ք այն տեղի է ունեցել միանգամից, ամբողջությամբ և պատշաճ ձևով»,- ասել է ԱՄՆ նախագահ Բարաք Օբաման: Նա նաև ասել է, որ վստահ չէ «Եգիպտոսի կառավարության՝ ժողովրդավարությանն անցնելու ցանկության անկեղծության հարցում»:
Նա հերթական անգամ կոչ է արել չխախտել մարդու իրավունքները` շեշտելով, որ քաղաքական փոփոխությունները պետք է անխուսափելի լինեն: Այս մասին հաղորդում է Associated Press գործակալությունը:
Նույն գործակալության հաղորդմամբ, Մուբարաքի ուղերձին և Եգիպտոսում ստեղծված իրավիճակին իր գնահատականն է տվել Ֆրանսիայի նախագահ Նիկոլա Սարկոզին: Վերջինս հույս է հայտնել, որ Եգիպտոսի չի կրկնի Իրանի ճակատագիրը, և երկրում չի հաստատվի կրոնական գործիչների դիկտատուրա:
Համապատասխան հայտարարությամբ հանդես է եկել նաև Եվրամիության արտաքին քաղաքական գերատեսչությունը, որտեղ նույնպես իբրև անորոշ են գնահատել Մուբարաքի հայտարարությունը:
