Կոալիցիան այսօր որոշել էր բոյկոտել ԼՂՀ անկախության ճանաչման մասին «Ժառանգության» նախագիծը։ ԱԺ հերթական քառօրյան արդեն մեկնարկել է. ԱԺ նախագահ Հովիկ Աբրահամյանը, ի թիվս մի շարք նախագծերի, քվեարկության դրեց ԼՂՀ անկախության ճանաչման մասին «Ժառանգություն» խմբակցության նախագիծը։
Գալուստ Սահակյանը վարման կարգի վերաբերյալ ձայն խնդրեց եւ հայտարարեց, որ ՀՀԿ, ԲՀԿ եւ ՕԵԿ խմբակցությունները համատեղ հայտարարություն են ստորագրել։ Նա ընթերցեց հայտարարությունը, ըստ որի՝ իրենք համոզված են՝ ԼՂՀ անկախության ճանաչումն այլընտրանք չունի, դա համայն հայության երազանքն ու նպատակն է։ «Մենք համոզված ենք, որ ՀՀ կողմից ԼՂՀ միակողմանի ճանաչման փաստը չի բխում Սերժ Սարգսյանի որդեգրած կառուցողական մոտեցումներից»,- հայտարարեց Սահակյանը՝ հավելելով, որ երբ գա ԼՂՀ անկախության ճանաչման պահը, իրենք կնախաձեռնեն այն։ Սահակյանը հայտարարեց, որ իրենք չեն մասնակցի քվեարկությանը։
Րաֆֆի Հովհաննիսյանը ձայն խնդրեց ու ասաց, որ իրենք հետաձգում են նախագծի քվեարկությունը մինչեւ դեկտեմբերի 9-ը ։ «Մշո Սուլթան Սուրբ Կարապետը մինչեւ դեկտեմբերի 9-ը լինի մեզ պահապան»,- ասաց Հովհաննիսյանը։
Խորհրդարանը քվեարկեց նախագծի քվեարկությունը հետաձգելու առաջարկն ու ընդունեց այն։
