Թաիլանդի արտաքին գործերի նախարար Քասիտ Փիրոմը մեղադրել է Ռուսաստանին Թաիլանդի և Կամբոջիայի միջև վերջերս ծագած հակամարտությունը հրահրելու մեջ, քանի որ Կամբոջիայի իշխանությունների ագրեսիան աջակցություն է ստանում Մոսկվայում: Թաիլանդի արտգործնախարարը այս հարցում մեղադրել է նաև Հնդկաստանին և Չինաստանին: Մանրամասները նա պատրաստվում է ներկայացնել ՄԱԿ-ի Անվտանգության խորհրդում, որի փետրվարի 14-ի նիստը նվիրված է լինելու Թաիլանդի և Կամբոջիայի միջև վերջին օրերի բախումներին:
Հիշեցնենք, որ երկու երկրների միջև բախումները սկսվել են անցած շաբաթ: Միջադեպը, որից հետո բախումները դարձել են լայնամասշտաբ, տեղի է ունեցել այն պահին, երբ չեզոք գոտում հայտնվել են երկու երկրների զորամիավորումները: Հիմնական վեճն առնչվում է 11-րդ դարի բուդդիստական տաճարին, որի պատկանելությունը երկու երկրները չեն կարողանում որոշել:
Հայտնի է, որ այս պահին զոհերի թիվը հասնում է առնվազն 11-ի, կան բազմաթիվ վիրավորներ, ավերածություններ: