Գիտատեխնիկական ու «գիտելիքահենք» տնտեսություն ունենալու համար պետք են դրան խթանող հանգամանքներ, սակայն գիտության փոքր բյուջեն դժվար թե հնարավոր լինի խթանիչ անվանել:
Գիտության բյուջեն այսօր կազմում է մեր բյուջեի ընդամենը 0,85%-ը, և այդ փոքր բյուջեն էլ ծախսվում է ոչ օպտիմալ։ 2010 թ. գիտության և կրթության բնագավառի բյուջեն կազմում էր 95 մլրդ դրամ, ինչը 13 մլրդ դրամով քիչ է ընթացիկ տարվա բյուջեից: 2009 թ. համեմատ, 2010 թ. բյուջեի ծախսերը կրճատվել են 12 տոկոսով, ընդ որում՝ Համաշխարհային բանկը և Եվրամիությունը կրթական ծրագրերի համար տրամադրել են 4 մլրդ դրամ:
Հայաստանի 2011-ի բյուջեով գիտության ոլորտին նախատեսված հատկացումները ակնհայտորեն էական փոփոխությունների չեն հանգեցնի այդ ոլորտում: Նախատեսված է գիտնականների աշխատավարձերի 9 տոկոսով կամ ընդամենը 5000 դրամով բարձրացում: Գիտական աշխատողներին տրվող հավելավճարները բյուջեում թողնված են անփոփոխ:
Այնպես որ, երևի թե հատկապես հենց այս հանգամանքով է պայմանավորված գիտական կազմակերպություններում և բուհերում որակյալ երիտասարդ կադրերի պակասը և նկատվող որակյալ կադրերի ու առաջին հերթին երիտասարդների արտահոսքը:
