«Պատերազմի սպառնալիքը պարզապես կողմերին, հատկապես հայկական կողմերին շանտաժելու միջոց է, սա միջազգային ճգնաժամային խմբի կողմից որդեգրած քաղաքական ուղեգիծն է»,- անդրադառնալով Միջազգային ճգնաժամային խմբի երեկ հրապարակած զեկույցում նշված այն հանգամանքին, թե հայ-ադրբեջանական պատերազմը հավանական է, «Առաջին լրատվականի» հետ զրույցում կարծիք հայտնեց ԼՂՀ նախկին արտգործնախարար Արման Մելիքյանը:
Մելիքյանը նշեց, որ ինչպես միշտ, այս անգամ էլ ICG զեկույցում անտեսված է ադրբեջանահայ փախստականների խնդիրը, այն դեպքում, երբ այնտեղ խոսվում է մոտ 600 հազար ադրբեջանցի ներքին տեղաշարժվածների վերադարձի իրավունքը իրականացնելու անհրաժեշտության մասին, բայց մեկ բառ անգամ չի ասում ադրբեջանահայ փախստականների մասին:
«Սա կրկին փորձ է Հայաստանը ներկայացնելու որպես ագրեսոր: Նրանք նաև ներկայացնում են հայկական կողմերի փաստարկները տարածքները չվերադարձնելու կապակցությամբ, այն տեսանկյունից, թե վերջիններս չեն ցանկանում տարածքները վերադարձնել, քանի որ դրա դիմաց առարկայական օգուտները նվազ կարևոր են, քան ստատուս քվոյի պահպանումը»,- նկատեց Մելիքյանը:
Նրա գնահատմամբ, սա ևս մեկ փորձ է ցույց տալու, թե հայկական կողմերը ժամանակին ագրեսիվ գործողությունների հետևանքով իրենց վերահսկողության տակ են վերցրել տարածքներ և ընդունում են, որ դա իրենցը չէ, բայց չեն էլ ցանկանում վերադարձնել. «Իրականությունը այդպիսին չէ, քանզի այդ տարածքները հանդիսանում են վտարանդի ադրբեջանահայության սեփականությունը: և քանի դեռ այդ մարդկանց խնդիրը չի ներառվել բանակցային օրակարգ և առարկայական քննարկման չի ենթարկվել, ստատուս քվոյի փոփոխության և տարածքներ վերադարձնելու մասին խոսակցությունները անիմաստ են և անպտուղ»:
