«Ազատ դեմոկրատներ» կուսակցությունում չեն եղել քննարկումներ՝ կապված ԼՂՀ-ում կայանալիք նախագահական ընտրությունների հետ. այսօր լրագրողների հետ հանդիպմանն ասաց կուսակցության անդամ Ալեքսանդր Արզումանյանը:
«Կարծում ենք, որ Արցախի ազգային հերոս Վիտալի Բալասանյանի առաջադրումը բավական հետաքրքիր ինտրիգ է մտցնում ընտրական գործընթացի մեջ: Պետք է անել ամեն բան, որպեսզի միջազգային հանրությունը տեսնի, որ Արցախում կարող են ազատ ու արդար ընտրություններ կայանալ: Սա ԼՂՀ-ի համար շատ կարևոր է»,- նշեց նա:
Անդրադառնալով ԼՂ հակամարտության հետ կապված առաջիկա հնարավոր զարգացումներին՝ Ալեքսանդր Արզումանյանը կարծիք հայտնեց, որ մոտակա մեկուկես-երկու տարիների ընթացքում որևէ առաջխաղացում չի լինի:
Ամփոփելով՝ ընդդիմադիր գործիչն անդրադարձավ «Բարգավաճ Հայաստան» կուսակցության գործելաոճին՝ նկատելով, որ քաղաքական այդ ուժը հինգ տարի շարունակ շատ հարմարավետ «տեղավորված էր» ՀՀԿ ծոցում՝ միաձայն համաձայնելով վերջինիս իրականացրած քաղաքականության բոլոր դրույթներին:
«ԲՀԿ-ի՝ կոալիցիայի մեջ չմտնելն ու կառավարության ծրագրին դեմ քվեարկելը հետաքրքիր ինտրիգներ մտցրին նրա գործունեության մեջ: Տեսնենք՝ որքան իրական կլինի «Բարգավաճ Հայաստան» կուսակցության «Մեր խոսքը գործ է» կարգախոսը, կկարողանա՞ նա մինչև վերջ պահպանել նույն դիրքերը»,- ասաց Ալեքսանդր Արզումանյանը: