Այսօր լրագրողների հետ հանդիպմանը «Ազատ դեմոկրատներ» կուսակցության անդամ Ալեքսանդր Արզումանյանը ողջունելի համարեց կառավարության ծրագրի շուրջ ԱԺ-ում ծավալված բուռն քննարկումները:
«Ծրագիրն ընդամենը ընդհանրական փաստաթուղթ էր, ուր շատ լավ ցանկություններ էին տեղ գտել, մինչդեռ պատգամավորները սպասում են հստակ ծրագրի՝ որոշելու դրա հետ կապված անելիքները: Կարծում եմ՝ կշարունակենք աշխատել կարծիքների ազատ արտահայտման մթնոլորտում»,- նշեց նա:
Անդրադառնալով էթիկայի հանձնաժողովի գոյության փաստին՝ Արզումանյանը նկատեց, որ դրա ստեղծումն ինքնին լավ, ողջունելի գաղափար է. «Բայց թե որքան արդյունավետ կաշխատի այդ հանձնաժողովը՝ ավելի ուշ կերևա: Մենք, որպես ընդդիմադիր կուսակցություն, ամեն դեպքում աշխատելու ենք թափանցիկ դարձնել այդ մարմնի աշխատանքը»:
Հարցին՝ ինչպիսի՞ ներքաղաքական զարգացումներ է կանխատեսում, ընդդիմադիր գործիչը նկատեց՝ ամռան ամիսներին անդորր կլինի, իսկ ահա սեպտեմբերից պարզ կդառնա՝ որ դաշտում է գործելու ԲՀԿ-ն:
«Կառավարության ծրագրին դեմ քվեարկելը դեռ ոչինչ չի նշանակում, ժամանակը ցույց կտա՝ կհամագործակցե՞ն ՀԱԿ-ն ու ԲՀԿ-ն, թե՞ ոչ: Շատ շուտով ամեն ինչ պարզ կլինի՝ ով ում ջրաղացին է ջուր լցնում, ով ում է քննադատում»,- նշեց նա:
