Հայ ազգային կոնգրեսը հանդես է եկել հայտարարությամբ.
«Կենտրոն-Նորք-Մարաշ վարչական շրջանների ընդհանուր իրավասության դատարանը բավարարեց երեք օլիգարխների՝ Սամվել Ալեքսանյանի, Լևոն Սարգսյանի եւ Ռուբեն Հայրապետյանի հայցն ընդդեմ «Հայկական ժամանակ» օրաթերթի՝ վերջինիս պարտավորեցնելով որպես տուգանք շուրջ 6,5 միլոն դրամ վճարել նրանց՝ արժանապատվությունը վիրավորող իբր ոչ ճիշտ տեղեկատվություն հրապարակելու համար։ Օրաթերթը ժամանակին այդ տեղեկատվությունը հրապարակել էր Մոսկվայում բնակվող «Միաբանություն» հ/կ նախագահ Սմբատ Կարախանյանի փոխանցմամբ՝ հղելով իր աղբյուրը։ Ընդ որում, առաջին հրապարակումից հետո, նույն աղբյուրը մի քանի անգամ հրապարակավ հաստատել է, որ ինքն է այդ տեղեկատվության հեղինակը եւ առաջարկել «վիրավորված» անձանց գործ ունենալ իր հետ։ Օլիգարխները դա չեն արել եւ շարունակել են հետամուտ լինել իրենց հայցի դատական քննությանը «Հայկական ժամանակի» դեմ։ Դատարանն իր հերթին, անտեսելով այդ ամենը, հայցը ետ չի ուղարկել եւ կայացրել է ակնհայտ անարդար, ակնհայտ ապօրինի վճիռ։ Տվյալ դեպքում, անշուշտ, կարեւոր դեր է խաղացել այն հանգամանքը, որ «Հայկական ժամանակի» գլխավոր խմբագիրը քաղբանտարկյալ Նիկոլ Փաշինյանն է»։
Հայ Ազգային Կոնգրեսը հայտարարում է, որ այս վճռով գործող ռեժիմը ծանրագույն հարված է հասցնում մամուլի ազատությանը Հայաստանում և ստեղծվում է ծայրահեղ վտանգավոր մի նախադեպ: Հետայսու տպագիր լրատվամիջոցներին դատական պատասխանատվության կարող են կանչել այլ անձի` տվյալ թերթում արտահայտած մտքերի համար: Հեռուստատեսության ոլորտը կատարյալ մենաշնորհացման ենթարկելուց հետո, իշխանությունը բացահայտում է իր ծրագիրը, այն է` տնտեսապես սնանկացնել ու ոչնչացնել այլակարծիք թերթերը` իրենց ծառա օլիգարխների կամ կամակատարների միջոցով: Կատարվածը նաև դատական համակարգի՝ օլիգարխիկ իշխանությանը անմնացորդ ծառայելու, ոչ միայն նվազագույն ինքնուրույնությունից, այլեւ նվազագույն մասնագիտական ու մարդկային արժանապատվությունից զուրկ լինելու խայտառակ մի ապացույց է։
Կոնգրեսը նաև հույս է հայտնում, որ այս խայտառակության նկատմամբ իրենց հստակ դիրքորոշումը կհայտնեն Եվրոպական կառույցները, մամուլի ու նրա ազատության խնդիրների, մարդու իրավունքների խնդիրներ հետապնդող հասարակական ու միջազգային կազմակերպությունները»։