Արիզոնայում բանտարկյալների մահապատժին հետևող մարդկանց առաջին անգամ ցույց կտան, թե ինչպես են բանտարկյալին մահացու ներարկում կատարում: Ինչպես հաղորդում է Associated Press-ը, մինչ այժմ «հանդիսատեսը» (սովորաբար դրանք լինում են հանցագործի հարազատները և լրագրողները) դատապարտյալին տեսնում էր միայն ներարկում կատարելուց հետո: Նման փոփոխություն մտցվել է ԶԼՄ-ների, այդ թվում՝ AP-ի ջանքերի շնորհիվ: Գործընթացն ավելի բաց դարձնելու կոչ արել էին նաև փաստաբանները, որոնք պատրաստվում են հետևել, որպեսզի դատապարտյալներին ավելորդ տանջանքների չենթարկեն:
Առաջին մահապատիժը, որին հնարավոր կլինի ամբողջությամբ հետևել, նահանգում տեղի կունենա հունիսի 27-ին: Մահապատժի ենթարկվողը կլինի Սեմյուել Վիլեգաս Լոպեսը, որը մահվան է դատապարտվել 1986 թ. 59-ամյա մի կնոջ սպանության համար:
Գործակալությունը նշում է, որ մի շարք նահանգներում մահապատժի ենթարկելու գործընթացը վաղուց բաց է իրականացվում:
