Աֆղանստանում Tajik Air պետական ընկերությանը պատկանող երկու Մի-8 ուղղաթիռ է ձերբակալվել: Այս մասին RIA Novosti-ին Քաբուլից հեռախոսով հայտնել է ինքնաթիռներից մեկի ինժեներներից Իլհամ Կայումովը:
Կայումովի խոսքերով՝ ինքը և իր գործընկերները Քաբուլում աշխատել են պայմանագրով: Մեկ ամիս առաջ նրանք ավարտել են աշխատանքը և պետք է տուն վերադառնային: Սակայն Աֆղանստանի տրանսպորտի նախարարության նախաձեռնությամբ՝ ձերբակալվել են (գերատեսչությունն օդաչուներին մեղադրել է այն բանում, որ նրանք իբր ցանկացել են առանց դիսպետչերական ծառայության թույլտվության հեռանալ): Ավելի ուշ նախարարությունը հրաժարվել է այդ հավակնություններից, սակայն ուղղաթիռները և անձնակազմի անդամներին այդպես էլ երկրից բաց չեն թողել:
Ինժեները հայտնել է, որ այժմ իրենց թռիչքին խոչընդոտում են տեղի ուժային կառույցները: Անձնակազմի անդամներին, նրա խոսքերով, պահում են Քաբուլի ծայրամասում գտնվող մի տանը:
Կայումովը նշել է, որ Տաջիկստանի ԱԳՆ-ն և Tajik Air-ի տնտեսական տնօրենը որոշել են օգնել այդ հարցում, սակայն իրավիճակը մինչ այժմ չի փոխվել:
Գործակալության տեղեկություններով՝ Tajik Air-ը օրերս հանդես կգա այդ խնդրի վերաբերյալ մեկնաբանությամբ:
