Ադրբեջանական Turan լրատվական գործակալության փոխանցմամբ՝ ԵՄ-ի դիվանագիտության ղեկավար Քեթրին Էշթոնը ողջունել է ադրբեջանցի քաղբանտարկյալների ազատարձակումը: Այս մասին նշված է նրա տարածած հայտարարության մեջ:
Դրանում Էշթոնն իր գոհունակությունն է հայտնում հունիսի 22-ին 9 քաղբանտարկյալների ազատարձակման կապակցությամբ, որոնք բանտում են հայտնվել 2011 թվականի ապրիլի 2-ին ընդդիմության խաղաղ ակցիային մասնակցելու համար. «Դա դրական քայլ է Ադրբեջանում խոսքի ազատության ու ազատ հանրահավաքների ապահովման ուղղությամբ:
Ես հուսով եմ, որ այդ որոշումը նպաստելու է նաև արմատական իրավունքների ու ազատությունների ամբողջական պաշտպանության ուղղությամբ այլ քայլերի կատարմանը, ինչպես նաև ժողովրդավարության ու օրենքի գերակայության ոլորտում Ադրբեջանի ստանձնած միջազգային պարտավորությունների կատարմանը: ԵՄ-ը պատրաստ է այդ հարցում օգնել Ադրբեջանին»:
