Միավորված ազգերի կազմակերպության դիտորդական խումբը չի վերսկսում իր առաքելությունը Սիրիայում՝ կապված անվտանգության հարցում առաջացած խնդիրների հետ: Այս մասին հաղորդում է Associated Press-ը՝ վկայակոչելով ՄԱԿ-ի ԱԽ գաղտնի աղբյուրը: Վերջինիս խոսքերով՝ ՄԱԿ-ի խաղաղպահ գործողությունների ղեկավար Էվրե Լադսուն ԱԽ-ին տեղեկացրել է, որ Սիրիայում իրավիճակը վտանգավոր է առաքելության համար:
Հիշեցնենք. ՄԱԿ-ի դիտորդների գործունեությունը Սիրիայում դադարեցվել էր 2012 թ. հունիսի 16-ին: Լադսուն նշել է, որ դիտորդները կարող են վերադառնալ Սիրիա, եթե այնտեղ իրավիճակը բարելավվի: Այնուամենայնիվ, դիտորդներից մի քանիսը նախկինի պես մասնակցւմ են Սիրիայում սահմանափակ թվով առաքելությունների: Լադսուն հայտնել է, որ պաշտոնական Դամասկոսն արգելել է ՄԱԿ-ի աշխատակիցներին օգտագործել արբանյակային հեռախոսներ:
ՄԱԿ-ի դիտորդական խմբի ղեկավար, գեներալ Ռոբերտ Մուդը ՄԱԿ-ի ԱԽ-ին տեղեկացրել է, որ դիտորդներն առնվազն 10 անգամ հայտնվել են ուղիղ կրակի տակ, ընդ որում՝ ՄԱԿ-ի խաղաղապահների 9 ավտոմեքենա վնասվել է կրակոցներից:
