Պարագվայի անցած շաբաթ պաշտոնանկ արված նախագահ Ֆերնանդո Լուգոն չի բացառում երկրի ղեկավարի պաշտոնին իր վերադարձը: Այս մասին հաղորդում է Telesur հեռուստաալիքը:
«Ոչինչ չի կարելի բացառել: Հակամարտությունը շարունակվում է, և այսօր կրկին ցույցեր են տեղի ունենում երկրի տարբեր շրջաններում»,- ասել է Լուգոն:
Հունիսի 22-ին Պարագվայի խորհրդարանը նրան իմպիչմենթ է ներկայացրել՝ կապված իր պարտականությունները չկատարելու հետ:
Այդ քայլը մի շարք երկրների կոշտ քննադատությանը ենթարկվեց, Լատինական Ամերիկայի մի քանի երկրներ հետ կանչեցին իրենց դեսպաններին, իսկ միջազգային կազմակերպությունները մտադիր են մոտակա օրերի ընթացքում իրենց գնահատականը տալ Պարագվայում ստեղծված իրավիճակին:
Լուգոն ընդգծել է, որ համաձայնել է խորհրդարանի որոշման հետ՝ ցանկանալով խուսափել բռնություններից, սակայն հիմա քաղաքացիների խաղաղ ցույցերն ուժով ճնշելը նոր իշխանությունների ամենամեծ սխալը կլիներ:
Մյուս շաբաթվանից սկսած՝ Լուգոն մտադիր է շրջագայել երկրում, որպեսզի անձամբ պատմի մարդկանց տեղի ունեցածի բուն էությունը:
