Գերմանիայում ատոմային էներգիայի օգտագործման դեմ պայքարողները մարտի 12-ին կազմակերպում են բողոքի ակցիա, որի ընթացքում պատրաստվում են 45 կմ երկարությամբ շղթա կազմել: Այն ձգվելու է «Նեքարվեսթհայմ» ատոմակայանից մինչև Բադեն-Վյուրթեմբերգ կառավարական շենքը Շտուտգարտում: Այս ակցիան տեղի է ունենալու Բադեն-Վյուրթեմբերգի խորհրդարանական ընտրություններից 2 շաբաթ առաջ:
«Սա լավ առիթ է` արտահայտելու մեր դժգոհությունը` ուղղված կառավարող կոալիցիայի կողմից վարվող ատոմային էներգետիկայի քաղաքականությանը: Բադեն-Վյուրթեմբերգի վարչապետը այդ քաղաքականության ջատագովներից է»,- ասվում է բնապահպանական կազմակերպության տարածած հաղորդագրությունում:
«Նեքարվեսթհայմ 1» ԱԷԿ-ը գործում է համեմատաբար հին և ավելի վտանգավոր գերմանական ռեակտորներով, որոնց աշխատանքը պետք է որ դադարեցվեր Գերմանիայի կողմից ատոմային էներգետիկայի ոլորտից դուրս գալու նախորդ կառավարության ծրագրին համապատասխան: Սակայն գործող կառավարությունը որոշել է, որ այս ԱԷԿ-ը կարող է աշխատել մինչև 2020 թ.:
2010 թ. սեպտեմբերին դաշնային կառավարությունը պայմանագիր կնքեց երկրի խոշորագույն էներգետիկական ընկերությունների հետ, որի համաձայն, երկարաձգվեց Գերմանիայի 17 ատոմակայանների գործարկման ժամկետը 8-14 տարով: Դրա դիմաց այդ ընկերությունները պարտավորվում են մինչև 30 մլրդ եվրո ներդրումներ իրականացնել վերականգնվող էներգետիկայի ոլորտում:
Այսպիսիով, վերջին ատոմակայանը Գերմանիայում կանջատվի (վերջնականապես կդադարի գործելուց) 2035 թ.: Սոցիալ-դեմոկրատների և «կանաչների» նախորդ կոալիցիոն կառավարությունը 2002 թ. օրենսդրությամբ ամրագրել էր, որ մինչև 2022 թ. աստիճանաբար կդադարեն գործել բոլոր ատոմակայանները:
Ի դեպ TNS Emnid սոցոլոգիական կենտրոնի հարցումների համաձայն` գերմանացիների 67%-ը դեմ է ԱԷԿ-ների աշխատանքի երկարաձգմանը:
Այս մասին հաղորդում է РИА-Новости գործակալությունը: