Բնապահպանները խորհրդակցում են՝ ինչպես կանգնեցնել Սևանա լճից ջրի բացթողումների ավելացումը։ Այսօր «Առաջին լրատվական»-ի հետ զրույցում այս մասին ասաց «Էկոլուր» հասարակական դաշինքի ղեկավար Ինգա Զառաֆյանը՝ խոսելով ընդունված օրինագծի մասին։ Նա նշեց, որ նախագծում առաջին ընթերցմամբ ընդունվել է, և իրենք չգիտեն, թե ինչպես կարելի է դա չեղյալ համարել։ «Մենք հիմա քննարկումներ ենք կազմակերպում, թե ինչպես կարող ենք դա կանգնեցնել։ Կան որոշ առաջարկություններ, սակայն դրանք դեռ հաստատված չեն»,- հստակեցրեց Ինգա Զառաֆյանը՝ նշելով, որ հնարավոր չէ կանխատեսել, թե Սևանն ինչպես կպատասխանի այս փոփոխությանը։ Նրա խոսքերով՝ Սևանա լիճը կենդանի օրգանիզմ է և կտրուկ փոփոխությունները շատ վտանգավոր կարող են լինել։
Հիշեցնենք, որ խորհրդարանն առաջին ընթերցմամբ ընդունեց Սևանա լիճը պաշտպանող օրենքների մեջ փոփոխություններ կատարելու մասին ՀՀ կառավարության ներկայացրած օրինագծերի փաթեթը, որով Սևանա լճից 170 միլիոն խ/մ-ի փոխարեն 320 միլիոն խ/մ ջուր պետք է բաց թողվի: 93 պատգամավոր «կողմ» քվեարկեց, 12-ը` «դեմ»: Ավելի վաղ բնապահպաններ Ինգա Զառաֆյանը, Սիլվա Ադամյանը «Առաջին լրատվական»-ի հետ զրույցում նշել էին, որ անհասկանալի են համարում այն պատճառաբանությունը, թե այս տարի երաշտ է լինելու, այդ պատճառով ոռոգման խնդիրներ կարող են առաջանալ։ Ըստ Սիլվա Ադամյանի՝ այս տարի բավական ջրառատ տարի է, ուստի այս պատճառաբանությունն անմիտ է։ Բնապահպանների կարծիքով՝ օրինագծի ընդունման համար այլ վարկածներ կարող են լինել, բայց ոչ դա։
Լուսանկարը՝ PanARMENIAN Photo-ի
