ԱԻՆ ջրափրկարարական հատուկ ջոկատը Սևանի լողափերում արդեն իսկ ավարտել է անվտանգ հանգստյան սեզոն ապահովող բոլոր անհրաժեշտ միջոցառումները և հայտարարում է, որ լիճը պատրաստ է ընդունել զբոսաշրջիկներին: Այսօր կայացած մամուլի ասուլիսի ժամանակ այս մասին ասաց Հայաստանի ԱԻՆ ջրափրկարարական հատուկ ջոկատի հրամանատար Սամվել Մկրտչյանը:
Նրա տեղեկացմամբ՝ երկու հանրային լողափերում իրենք շուրջօրյա հսկողություն են իրականացնում, իսկ այն գոտիներում, ուր ջրափրկարարներ չկան, տեղադրված են համապատասխան ցուցանակներ:
«Ինչպես նախատեսել է կառավարությունը, հանրային լողափերի թիվն այս տարի կավելանա հինգով, սակայն դրանք սպասարկելու համար մենք նոր ուժեր դեռևս չունենք: Հատկանշական է, որ յուրաքանչյուր լողափ պետք է սպասարկի ամենաքիչը յոթ ջրափրկարար: Քանի որ հաստիքների սղության պատճառով մեր ուժերը ուղղակի չեն բավականացնում (այս պահի դրությամբ ջոկատն ունի 37 անդամ, սակայն առաջիկայում նախատեսվում է նրանց թիվն ավելացնել), այդ պատճառով էլ լողափերի սեփականատերերին հորդորում ենք ունենալ սեփական լիցենզավորված ջրափրկարարներ, որոնք կկարողանան կանխել դժբախտ պատահարները»,- նշեց Սամվել Մկրտչյանը՝ հավելելով, որ ջոկատի շարքային աշխատողների աշխատավարձը 70.000 դրամ է, ենթասպաներինը՝ 90.000, իսկ որոշ ծառայողներինը՝ մինչև 120.000:
Ոլորտի պատասխանատուն տեղեկացրեց, որ այս տարի՝ հանգստյան սեզոնին, ջրահեղձումների դեպքեր դեռևս չեն գրանցվել. «Սական, ինչպես հիշում եք, փետրվարին լճի սառույցի կոտրվելու հետևանքով երեք մարդ էր խեղդվել: Հատկանշականն այն է, որ հանգստի սեզոնին ջրահեղձման հիմնական դեպքերը գրանցվում են երեկոյան ժամը 4-ից-5-ից հետո՝ մեծամասամբ հանգստացողների գինովցածության պատճառով: Բայց եղել են նաև դեպքեր, երբ մարդիկ մահացել են, ասենք, մոտորանավակների բախման արդյունքում»:
ԱԻՆ ջրափրկարարական հատուկ ջոկատի հրամանատարը նշեց նաև, որ նախորդ տարի Սևանում գրանցվել է մահվան 6 դեպք, 3-ը՝ ինֆարկտի պատճառով:
Սամվել Մկրտչյանը հայտարարեց, որ արդեն մոտ օրերս իրենց ջոկատը նոր համազգեստ կստանա, ինչն էլ հանգստացողներին հնարավորություն կտա հստակ տարբերակել մոտակայքում գտնվող ջրափրկարարներին: «Բացի այդ, պատրաստվում ենք մասնակցել սեպտեմբերին Վրաստանում կայանալիք ՆԱՏՕ-ի զորավարժություններին»,- նշեց նա:
Ամփոփելով՝ Սամվել Մկրտչյանը Սևանի ափին հանգստանալ պատրաստվողներին հորդորեց լողալ միայն իրենց ջոկատների կողմից վերահսկվող կամ գոնե մարդաշատ վայրերում և, որ ամենակարևորն է, սթափ վիճակում:
