Թուրքական Anadolu գործակալության փոխանցմամբ՝ ադրբեջանական SOCAR և թուրքական BOTAŞ և TPAO ընկերությունները կստորագրեն «Անդրանատոլիական» գազատարի (TANAP) նախագծի իրագործման պաշտոնական համաձայնագիրը:
Նախագիծն իրագործվելու է 6 տարվա ընթացքում, դրանում ներդրվելու է 7 միլիարդ դոլար: Համաձայնագրի ստորագրումը տեղի է ունենալու Ստամբուլում՝ վարչապետ Ռեջեփ Էրդողանի նստավայրում: Դրան մասնակցելու են Թուրքիայի էներգետիկայի և բնական պաշարների նախարար Թաներ Յըլդըզն ու Ադրբեջանի էներգետիկայի և արդյունաբերության նախարար Նատիգ Ալիևը:
Նոր կառուցվելիք խողովակաշարում թուրքական մասնաբաժինը կազմում է 20, իսկ ադրբեջանական մասնաբաժինը՝ 80 տոկոս: Գազատարի երկարությունը կազմելու է մոտ 2000 կիլոմետր, իսկ տարեկան թողունակությունը՝ 16 միլիարդ խորանարդ մետր, որից 6 միլիարդ խորանարդը նախատեսված կլինի Թուրքիայի, իսկ մնացյալ մասը՝ Եվրոպայի համար:
