Գյուղատնտես, ՀՀ գյուղատնտեսության բուսաբուծության և բույսերի պաշտպանության վարչության նախկին պետ Գագիկ Մանուչարյանը դրական է գնահատում գյուղմթերքների շուկայի վերաբացումը և դրանց թվի ավելացումը մայրաքաղաքում: Ինչպես «Առաջին լրատվական»-ի հետ զրույցում նշեց Գ. Մանուչարյանը, դրա արդյունքում գյուղացին անմիջապես շուկա մտնելու և գին որոշելու հնարավորություն է ստանում, հակառակ դեպքում գյուղացին արտադրանքը բերում է քաղաք, քաղաքում, այսպես կոչված, «բիրիք» գնորդներն ամբողջութամբ գնում են իրենց հարմար գնով և վերավաճառում են զգալիորեն ավելի թանկ:
«Այս դեպքում շատ ճիշտ մոտեցում է, միայն պետք է հետևեն, որ տեղի բնակիչները չներթափանցեն և առևտուր չանեն այդ շուկաներում, թե չէ այդ դեպքում ոչ մի տարբերություն չի լինի սովորական շուկայի համեմատ: Միայն վատն այն է, որ ամբողջ շրջապատն աղտոտվում է: Մարդիկ մի փոքր շուկա են բացում, առևտուր են անում, քաղաքապետարանից գալիս արգելում են, թե աղտոտում եք, հակահիգիենիկ է, կեղտոտում են: Այս դեպքում ինչպե՞ս մոտենաս հարցին: Ինչո՞ւ, հասարակ գյուղացուն չի կարելի, պետականորեն կարելի՞ է: Եթե այդ ամենը ճիշտ կազմակերպեն, սանիտարահիգիենիկ վիճակը նորմալ լինի, գաղափարը շատ լավն է»,- ասաց Գ. Մանուչարյանը:
