Հնդկաստանում ձերբակալվել է Աբու Համզան, հայտնի նաև Սայեդ Զաբիուդդին անունով, որը կասկածվում է 2008 թ. Մումբայիում ահաբեկչություններ կազմակերպելու մեջ: Այս մասին հաղորդում է Agence France-Presse-ը՝ վկայակոչելով հնդկական The Press Trust of India լրատվական գործակալությանը: Վերջինս էլ իր հերթին վկայակոչում է ոստիկանության գաղտնի աղբյուրներին:
Համաձայն այդ տեղեկությունների՝ կասկածյալը ձերբակալվել է Դելիի միջազգային օդանավակայանում հունիսի 21-ին, երբ վերադառնում էր մերձավորարևելյան երկրներից մեկից: Մինչ այժմ նա ձերբակալված է: Հնդկական IBN հեռուստաալիքի տեղեկությունների համաձայն՝ Համզան Հնդկաստանի խնդրանքով արտաքսվել է Սաուդյան Արաբիայից: Ահաբեկիչը փնտրվում էր Ինտերպոլի կողմից:
Համզան, ենթադրվում է, ահաբեկչությունների ժամանակ հրահանգներ է տվել ահաբեկիչներին հեռախոսով, իսկ ինքն այդ ժամանակ Պակիստանի Կարաչի քաղաքում էր:
Հնդկաստանում ծնված 30-ամյա Համզան պակիստանյան «Լաքշար-ի-Տայբա» խմբավորման անդամ է:
2008 թ. նոյեմբերի 26-ին Մումբայիում տեղի ունեցան մի շարք ահաբեկչություններ: 10 հանցագործներ հարձակվեցին մի քանի հյուրանոցների վրա, որտեղ մնում էին հիմնականում օտարերկրացիներ, ինչպես նաև կրակ բացեցին մի քանի այլ հաստատությունների վրա: Զինյալների ոչնչացման գործողությունն ավարտվեց նոյեմբերի 29-ի առավոտյան: Ահաբեկչությունների հետևանքով սպանվեց 166, վիրավորվեց ավելի քան 300 մարդ: Միակ ողջ մնացած զինյալը՝ պակսիտանցի Աջմալ Ամիր Քասաբը, 2010 թ. մայիսին դատապարտվեց մահվան: Դատավճիռը վիճարկելու նրա փորձերը հաջողությամբ չպսակվեցին:
Ահաբեկչությունների պատասխանատվություն ստանձնել է «Սեքքան մուջահիդին» խմբավորումը: Հնդկաստանի իշխանությունները կարծում են, որ հարձակումների ետևում կանգնած է իսլամիստական «Լաքշար-ի-տայբա» խմբավորումը: Նրա հիմնադիրներից մեկի՝ Հաֆիզ Մուհամմադ Սայիդի համար ԱՄՆ-ը խոստացել է 10 մլն դոլար պարգևավճար:
