«Առաջին լրատվական»-ը Հայաստանում Հրեական համայնքի ղեկավար Ռիմա Վարժապետյանից հետաքրքրվեց, թե ինչպես է վերաբերվում այն փաստին, որ Հայաստանի իշխանություններն ուզում են խորհրդարանը դարձնել երկպալատանի, որտեղ պետք է ընդգրկվեն նաեւ սփյուռքահայերը: Եվ սա այն դեպքում, երբ ազգային փոքրամասնությունները ներկայացված չեն Հայաստանի խորհրդարանում:
«Ես կարծում եմ, որ դա Սփյուռքի հետ աշխատելու համար վատ սկիզբ չէ: Դա կարող է մեծ օգուտ բերել Հայաստանին: Սփյուռքը մեծ ուժ է, որը կարող է օգնել Հայաստանին: Մյուս կողմից` մարդիկ, որոնք ապրում են Հայաստանից դուրս եւ չեն ապրում Հայաստանի կյանքով, նրանց համար դժվար է Հայաստանի ներքին կյանքին մասնակցելը եւ այն ղեկավարելը: Կարծում եմ, որ Սփյուռքը պետք է օգնի Հայաստանին, բայց չթելադրի»,- մեր զրույցի ժամանակ նշեց Ռիմա Վարժապետյանը:
Իսկ այն փաստը, որ ազգային փոքրամասնությունները ներկայացված չեն Հայաստանի խորհրդարանում, Ռիմա Վարժապետյանը գնահատում է շատ վատ: «Լավ կլիներ, որ մեր ներկայացուցիչն անպայման լիներ խորհրդարանում եւ այնտեղ արծարծեր մեզ հուզող հարցերը»,- ասաց Ռիմա Վարժապետյանը:
