Վանաձոր-Ֆիոլետովո երկաթուղու կառուցման համար բնապահպանական, քաղաքաշինական, էներգետիկ, երկրաբանական եւ այլ խնդիրների շրջանակներում տեղանքը ուսումնասիրելու եւ առավել արդյունավետ ծրագիր ընտրելու նպատակով ՀՀ տրանսպորտի եւ կապի նախարար Մանուկ Վարդանյանի հրամանով ստեղծվել է միջգերատեսչական հանձնաժողով: Այս մասին ասվում է ՀՀ տրանսպորտի և կապի նախարարության տարածած հաղորդագրության մեջ:
Հանձնաժողովում ընդգրկվել են տարբեր շահագրգիռ գերատեսչությունների, այդ թվում` ՀՀ տրանսպորտի եւ կապի, տարածքային կառավարման, քաղաքաշինության, էներգետիկայի եւ բնական պաշարների նախարարությունների, կառավարությանն առընթեր անշարժ գույքի կադաստրի պետական կոմիտեի, «Տրանսնախագիծ» ինստիտուտի, «Հարավկովկասյան երկաթուղիներ» ընկերության ներկայացուցիչներ:
Մինչեւ այս տարվա դեկտեմբերի 1-ը՝ հանձնաժովողը պետք է ավարտի ուսումնասիրման աշխատանքները եւ արդյունքների մասին համապատասխան եզրակացություն ներկայացնի տրանսպորտի եւ կապի նախարար Մանուկ Վարդանյանին:
Հանձնաժողովի աշխատանքներին, ըստ անհրաժեշտության, մասնակից կդառնան նաեւ համապատասխան համայնքների ղեկավարները: