Փետրվարի 8-ին` առավոտյան ժամը 9-ից սկսած, Ոստիկանության Գյումրու քաղաքային և Շիրակի մարզային վարչությունները մոտ 250-300 ոստիկանական ուժեր էին տեղադրել Գյումրու կայարանամեձ հրապարակում, որտեղից Շիրակի մարզի վրացական պետհամարանիշերով ավտոմեքենաների վարորդները պլանավորել էին սկսել խաղաղ երթը դեպի Բավրա: 9:50 րոպեից սկսած Գյումրու քաղաքային ոստիկանության աշխատակիցները բռնի կերպով զավթել են վրացական պետհամարանիշերով երեք ավտոմեքենա և վարորդների հետ դրանք տեղափոխել ՃՈ Գյումրու տուգանային հրապարակ: Այդ մեքենաները օրենքով սահմանված կարգով կայանած են եղել հրապարակի հարավային մայթի մոտ:
Մինչև ժամը 11:30-ը ոստիկանական ուժերը, որոնց մի մասը զինված էին մահակներով, պաշարած են պահել կայարանամերձ հրապարակը, թույլ չտալով այնտեղ կայանել վրացական պետհամարանիշերով ավտոմեքենաներին: Դրանց փոխարեն ամբողջ հրապարակը լի էր ոստիկանների մեքենաներով:
11:30-ին մի քանի տասնյակ վարորդ գնացին ՃՈ Գյումրու բաժին այնտեղ տարված մեքենաները ստանալու, իսկ մյուսներն իրենց ավտոմեքենաներով ուղղվեցին Ժուռնալիստների «Ասպարեզ» ակումբ` խորհրդակցելու: Ոստիկանական ուժերի մի մասը, ինչ-ինչ կասկածներ ունենալով ուղղվեցին Գյումրու հյուսիսային դարպաս և դիրքավորվեցին Մ1 մայրուղու վրա, իսկ մյուսները` գնացին մոտ 60 հոգի և 20 ավտոմեքենա` Ժուռնալիստերի «Ասպարեզ» ակումբի գտնվելու վայր: Վերջինները բառացիորեն պաշարել էին ակումբը ու հարակից տարածքները` մոտ 500 մ շառավղով, փակելով ավտոմեքենների ազատ տեղաշարժի հնարավորությունը Պուշկինի, Ղուկասյան և Մյասնիկյան փողոցներով` Գորկու և Մուսայելյան փողոցների կողմից: Պաշարումը տևեց մոտ 2 ժամ:
Ժամը 13:30-ին ՃՈ Գյումրու բաժինը թույլ տվեց վարորդներին տուգանային հրապարակից վերցնել իրենց մեքենաները:
Ժամը 12-ին վրացական պետական համարանիշերով ավտոմեքենաների մոտ 80 վարորդներ, հավաքված են Ժուռնալիստների «Ասպարեզ» ակումբում, քննարկում են իրենց անելիքները և Երևանից նրանց հետ հանդիպման համար ճամփա ընկած «Ժառանգություն» կուսակցության պատգամավորներին:
Ժուռնալիստների «Ասպարեզ» ակումբ
Լ.Բարսեղյան