Հայաստանի ներքաղաքական կյանքի այսօրվա հիթային իրադարձությունը Ռոբերտ Քոչարյանի հերթական հարցազրույցն էր «Մեդիամաքս» գործակալությանը, որտեղ նա անդրադառնում էր Գագիկ Ծառուկյանի օրերս արած հայտարարությանը:
Ինչպես հայտնի է, Ծառուկյանը մի քանի օր առաջ հայտարարել էր, որ եթե Քոչարյանն ուզենար, ապա իր նախագահության ժամանակ կգլխավորեր ՀՀԿ-ն: Դրան ի պատասխան` ՀՀԿ-ականները բուռն գրոհ սկսեցին Ծառուկյանի դեմ, և նա ի վերջո ստիպված եղավ իրեն պատկանող «Կենտրոն» հեռուստաընկերության եթերում մեղայականով հանդես գալ` որ միտք չի ունեցել վիրավորել ՀՀԿ-ականներին և կուսակցության ղեկավար Սերժ Սարգսյանին:
Եվ ահա, երեկվա հարցազրույցում Ռոբերտ Քոչարյանը փաստացի հաստատում է Գագիկ Ծառուկյանին և հայտարարում, որ եթե ցանկանար` կգլխավորեր մեծամասնություն կազմող ՀՀԿ-ն: Քոչարյանը հայտարարում է նաև, որ 2003 թվականին և 2007 թվականին ՀՀԿ նախընտրական ցուցակները մեկ առ մեկ ճշտվել են իր հետ, ինչպես նաև ինքն է ՀՀԿ կադրային ներուժը համալրել` գործադիր պաշտոնյաներին հորդորելով մտնել ՀՀԿ:
Այլ կերպ ասած` Քոչարյանը, փաստորեն, հայտարարել է, որ ՀՀԿ-ն` Սերժ Սարգսյանով հանդերձ, իրենն է: Բայց, միևնույն ժամանակ, Քոչարյանի հարցազրույցը թերևս ոչ միայն ՀՀԿ-ին և նրա ղեկավարին, այլ նաև ԲՀԿ-ին և հատկապես նրա ղեկավարին` Գագիկ Ծառուկյանին էր ուղղված: Քոչարյանն, ըստ երևույթին, բավական դժգոհ է Գագիկ Ծառուկյանի հեռուստամեղայականից և որոշել է «թեման» անձամբ շարունակել` չվստահելով Գագիկ Ծառուկյանին, ով կարող է ամենապատասխանատու պահին նահանջել կամ մեղա գալ Սերժ Սարգսյանի առաջ:
Ահա այդ իմաստով Ռոբերտ Քոչարյանն, ըստ երևույթին, իր դժգոհությունն է հայտնում Ծառուկյանից և փորձում է հակահանրապետական մարտավարության իրականացումը գոնե այս պահին վերցնել իր ձեռքը` ըստ երևույթին համարելով, որ պահն իսկապես պատասխանատու և վճռորոշ է և այս ժամանակահատվածում նահանջը կարող է լինել ճակատագրական:
Թեև այդ առումով, իհարկե, Քոչարյանն ինքը բավական խնդիրներ ունի, քանի որ նախագահական պաշտոնը թողնելուց հետո սա հերթական դեպքն է, երբ նա փորձում է ինչ-որ ներքաղաքական գործընթաց նախաձեռնել, սակայն մի հարցազրույց տալուց հետո հարկ է լինում ամիսներ շարունակ լռել` մոլորության մեջ գցելով իր համախոհներին:
Այնպես որ, Քոչարյանն ինքը մի քանի անգամ արդեն իսկ նահանջել է Սերժ Սարգսյանի առաջ, և միանգամայն հավանական է, որ իրադարձությունների զարգացումը վերցնելով իր ձեռքը` Քոչարյանն իր հետնախագահական կենսագրության ընթացքում հերթական անգամ կգործի «մեկ քայլ առաջ` երկու քայլ հետ» սկզբունքով: