Հանրահավաքային պայքարն ուժերը մոբիլիզացնող հատկություն ունի, սակայն ՀԱԿ-ը ճիշտ կանի՝ հրաժարվի պայքարի այդ ձևից՝ հաշվի առնելով, որ նրա անցկացրած վերջին հանրահավաքներն այդքան էլ մարդաշատ ու արդյունավետ չէին: «Առաջին լրատվական»-ի հետ զրույցում նման տեսակետ հայտնեց ՌԱՀՀԿ փորձագետ Էդգար Վարդանյանը՝ պատասխանելով հարցին, թե խորհրդարանական պայքարից զատ որքա՞ն արդյունավետ կարող է լինել ՀԱԿ-ի հանրահավաքներ անցկացնելու մեխանիզմը:
«Փողոցային պայքարը, եթե ճիշտ է կազմակերպված, կարող ես ազդել ինչպես շարքային քաղաքացիների, այնպես էլ իշխանությունների վրա: Բայց եթե ՀԱԿ-ն այնպիսի ակտիվություն է ցուցաբերելու, ինչպիսին ցուցաբերում է վերջին հանրահավաքների ժամանակ, ակցիաներ կանցկացնի, թե ոչ՝ մեկ է լինելու: Այլ բան է, եթե հանրահավաքները վերածվեն քաղաքացիական անհնազանդության, վերջնագրեր ներկայացնելու միջոցառումների: Այս դեպքում միանշանակ է, որ խորհրդարանական պայքարը չես համեմատի փողոցային պայքարի հետ: Եթե ԱԺ դահլիճում 131 հոգի է նստած, և այդքան մարդ է քեզ լսում, ապա հրապարակում մի քանի հազար մարդ է հավաքվում»,- նկատեց Էդգար Վարդանյանը:
Հիշեցնենք՝ ՀԱԿ խմբակցության ղեկավար Լևոն Զուրաբյանը վերջերս հայտարարել էր, որ Հայ ազգային կոնգրեսը խորհրդարանական դասական ուժ չի լինելու և ԱԺ ամբիոնից զատ՝ իր տեսակետները հանրությանը փորձելու է հասցնել պարբերաբար կազմակերպվող հանրահավաքների միջոցով:
