ՀՀ կրթության և գիտության նախարարության կրթության ազգային ինստիտուտում տեղի է ունեցել «Լավագույն ուսուցիչ» մրցույթի հանրապետական եզրափակիչ փուլը: Այս մասին «Առաջին լրատվական»-ին հայտնում են ՀՀ կրթության և գիտության նախարարության լրատվական ծառայությունից:
Մրցույթն անցկացվել է 5 առարկայական խմբերի՝ «Հայոց եկեղեցու պատմություն», «Հայոց լեզու և գրականություն», «Հայոց պատմություն», բնագիտական՝ «Ֆիզիկա», «Քիմիա», «Կենսաբանություն» առարկաների ուսուցիչների և դասվարների միջև: Դասվարները մրցույթում ներառվել են անցյալ տարվանից:
Մրցույթի արդյունքները կամփոփվեն մինչև հուլիսի 1-ը, իսկ հաղթողների անունները կհրապարակվեն սեպտեմբերին: Սահմանված կարգի համաձայն՝ եզրափակիչ փուլի բոլոր մասնակիցները կստանան պատվոգրեր, մրցանակային առաջին, երկրորդ և երրորդ տեղերի համար նախատեսված են նաև դրամական պարգևներ:
Մրցույթի եզրափակիչ փուլին մասնակցել է 39 ուսուցիչ: Եզրափակիչ փուլը բաղկացած է երկու` բանավոր և գրավոր մասերից, որոնք անցկացվում են միևնույն օրը: Բանավոր փուլի ընթացքում կազմակերպվում են քննարկումներ և բանավեճեր, իսկ թեստային փուլը ներառում է առարկայի դասավանդման մեթոդների վերաբերյալ հարցաշար:
Մրցույթն անցկացվում է ՀՀ կրթության եւ գիտության նախարարության և Մայր Աթոռ Սուրբ Էջմիածնի նախաձեռնությամբ արդեն 9-րդ տարին անընդմեջ:
Մայր Աթոռի քրիստոնեական դաստիարակության կենտրոնի տնօրեն, հոգեշնորհ Տեր Վարդան աբեղա Նավասարդյանը, կարևորելով ձևավորված համագործակցությունը, ընդգծել է, որ մրցույթի նպատակն է հանրային և հոգևոր կյանքում մանկավարժի դերի և հեղինակության բարձրացումը: Նա նաև նշել է, որ նախատեսվում է մրցույթի շրջանակն ընդլայնել՝ առաջիկա տարիներին կընդգրկվի նաև «լավագույն դաստիարակ» անվանակարգը, որպեսզի նախադպրոցական ուսումնական հաստատության մանկավարժները ևս հնարավորություն ունենան մասնակցել մրցույթին:
