«Վանաձոր-Քիմպրոմ» ՓԲԸ-ի վանաձորի թիվ 3 հանրակացարանի ժամանակավոր գրանցում ունեցող բնակիչները կրկին անջուր են մնացել: Երեկ առավոտյան կտրել են ջուր մատակարարող խողովակը. հանրակացարանի 4-րդ հարկի բնակիչները ջուր չունեն, օգտվում են առաջին հարկի կացարանների ծորակներից:
4-րդ հարկի բնակիչների համար ջուրը միշտ էլ խնդիր է եղել. «16 տարի է՝ տանս ջրի համար կռիվ է, ես իմ երեխի վրա եմ գցում, աշխատող ամուսնուս եմ խնդրում, թե մի դույլ էլ դու բեր, ու դրանից կռիվ է դառնում»,- ասում է 3 երեխաների մայր Քրիստինեն:
Բնակիչները բողոքում են, թե մի քանի տարի առաջ այդ փականն ընդամենը շորով ու լարով փաթաթած էր, ու էլի ջուր չունեին, հիմա էլ եկել, խողովակն են կտրել: 4-րդ հարկի բնակիչները պնդում են, թե հենց այդ խողովակով է իրենց հարկ ջուր բարձրացել: «42 տարվա խողովակը ինչի պիտի կտրեին, եթե հանրակացարանին վերաբերող կա, բոլորին պետք հավաքեն, տեղյակ պահեն, ինչո՞ւ առանց իրազեկելու զոդող բերեցին ու կտրեցին»,- ասում է Անահիտ Մարկոսյանը:
Քիմգործարանի հանրակացարանի վարիչ Ջուլիետա Ալեքյանը խնդիրն այսպես մենաբանեց. «Դա շրջանցող խողովակ էր, որը ջրմուղի կողմից մի քանի անգամ կապարվել է, բնակիչներն էլ կնիքը պոկել են, որի պատճառով գործարանը տուգանք է վճարել, փաստորեն ջուրն այդ տարբերակով հաշվիչի մեջ չի մտնելու, և համարվում է ջրագողություն»:
«Լոռի ջրմուղ-կոյուղի» ՓԲԸ տեխնիկական տնօրեն Գագիկ Ալոյանը փաստում է, որ շրջանցող ջրագիծը հեռացվել է ընկերությն պահանջով` ջրագողությունը կանխելու համար:
Բնակիչներն արդեն դիմում-բողոք են ուղղել ընկերությանը, որում պարզաբանել են կնիքը հեռացնելու պատճառը. «Որ գալիս են կնքելու, լրիվ չես կարողանում բացես, որ վերջին հարկերն էլ ջուր ստանան, պտտելու արդյունքում է պոկվում»,- ասում են բնակիչները:
