Լեհական «Газетa Выборчa» թերթի լրագրող Անջեյ Պոչոբուտը ձերբակալվել է բելառուսական Գրոդնո քաղաքում։ Այս մասին հայտնում են բելառուսական ընդդիմադիր ինտերնետ ռեսուրսները։
Լրագրողին, որն արդեն 2011-ի ամռանը դատապարտվել էր 3 տարվա ազատազրկման՝ դատավճռի իրագործման երկամյա հետաձգմամբ, կրկին մեղադրում են հանրապետության նախագահ Ալեքսանդր Լուկաշենկոյին զրպարտելու մեջ։
Պոչոբուտին ձերբակալել են նրա տանը, որտեղ խուզարկություն է անցկացվել։ Լրագրողից առգրավել են համակարգիչը և նրան տարել հարցաքննության, սակայն նա հրաժարվել է պատասխանել իրեն ուղղված հարցերին։ Նրան ուղարկել են Գրոդնոյի բանտ։
Մեղադրանքի համար հիմնավորում են հանդիսացել «Хартия’97»-ի և «Белорусский партизан»-ի կայքերում հրապարակված Պոչոբուտի հոդվածները։ Իր նյութերում լրագրողը կարծիք էր հայտնել, թե Լուկաշենկոն ազդել է Մինսկի մետրոյում տեղի ունեցած ահաբեկչության գործի արդյունքի վրա։
Պոչոբուտը առաջին գործով դատապարտվել էր 2011-ի հուլիսին։ Այդ ժամանակ նա իրեն մեղավոր չէր ճանաչել և հայտարարել էր, որ Լուկաշենկոյին ոչ թե զրպարտել է, այլ պարզապես առաջնորդի գործողությունները կոշտ քննադատության է ենթարկել։ Դատարանը զրպարտություն է տեսել նախագահի հասցեին հնչեցված «բռնապետ» բառում։
