16-ամյա Սյուզաննա (Սուսաննա) Հովհաննիսյանն աշխատել է Կրասնոյարսկում` իր մորաքույր Ալինա Հովհաննիսյանի մոտ՝ «Կրասնոյարսկ» առևտրի կենտրոնի ամառային սրճարանում: Աղջիկն աշխատել է թե՛ սրճարանի խոհանոցում, թե՛ որպես մատուցողուհի մինչ այն պահը, երբ անհետացել է: Այս մասին հայտնում է krsk.kp.ru-ն:
Հունիսի 10-ին Սյուզաննան գնացել է սրճարան՝ մորաքրոջ մոտ, ով ժ. 11.00-ին գնացել է տուն, սակայն սրճարանը լի է եղել հաճախորդներով, ու Սյուզաննան մնացել է, որպեսզի օգնի իր գործընկերներին։ Մորաքույրը նրան թողել է մի պայմանով, որ սրճարանատերերը փակելուց հետո նրան միանգամից տուն տանեն: Գիշերը՝ ժ. 2.00-ի սահմաններում Ալինան լսել է, թե ինչպես է իրենց տանը մոտեցել մեքենան, Սյուզաննան դուրս է եկել ավտոմեքենայից, հրաժեշտ տվել ընկերներին ու մտել շքամուտք, սակայն այդպես էլ չի բացել բնակարանի դուռը:
10 րոպե անց անհանգստացած Ալինան սկսել է զանգել զարմուհուն բերած ընկերներին, նրանք վերադարձել ու սկսել են միասին աղջկան փնտրել բակում, ապա հարակից տարածքներում, սակայն՝ ապարդյուն։
Հարազատները սպասել են մինչև հաջորդ օրը, ապա գնացել են ոստիկանություն:
Մորաքույրը հայտնել է, որ Հայաստանում աղջկա տատիկը հիվանդ է, իսկ ծնողներին վախենում են հայտնել նրանց դստեր անհետացման լուրը: Կինը խոստովանել է, որ վիճել է զարմուհու հետ նրա անհետացման նախօրեին ու սպառնացել աղջկան հետ ուղարկել Հայաստան, իսկ աղջիկը չէր ցանկանում վերադառնալ հայրենիք:
Սյուզաննան իր ընկերուհիներից մեկին` 16-ամյա Դաշային պատմել է, որ ցանկանում է փախչել տնից: Ալինայի խոսքերով` աղջկա շփման շրջանակը խիստ նեղ է եղել, քաղաքը վատ է ճանաչել` Գյումրիից նա միայն անցած տարվա սեպտեմբերին է տեղափոխվել մորաքրոջ մոտ:
Գյումրիում աղջկան դաստիարակել է տատիկը, աղջիկը ցանկանում էր ընդունվել բժշկական ուսումնարան, սակայն հղի մորաքրոջն օգնական է անհրաժեշտ եղել, ու նա գնացել է Կրասնոյարսկ:
Ալինայի խոսքերով` ինքն ու ամուսինը հսկել են աղջկա ամեն քայլը, իմացել` որտեղ է և ում հետ: Մորաքույրը պատմել է, որ Սյուզաննայից խլել են բջջայինը, երբ նկատել են, որ նա sms է գրում ինչ-որ մեկին: Պարզվել է, որ աղջիկը Միշա անունով ուզբեկ երկրպագու ունի, ով նրանից շատ մեծ է ու թիկնապահ է աշխատում:
Ալինան ասել է, որ աղջկան Միշայի մոտ էլ չեն գտել: Անհետացումից հետո պարզվել է, որ նա երկրորդ բջջայինն է ունեցել, որը թաքցրել է մորաքրոջից: Այդ համարով կինը sms-ներ է ուղարկել` խնդրելով զարմուհուն հետ վերադառնալ, սակայն դրանք մնացել են անպատասխան:
Ոստիկանությունը տեղեկություններ չի տրամադրում որոնողական աշխատանքների մասին: Աղջկա անհետացման գործով քրեական գործ չի հարուցվել, թեև անհետացման քրեական վարկածը չի բացառվում: