Բեյրութի «Արարատ» թերթի գլխավոր խմբագիր Ահարոն Շրխտմյանի համար տարօրինակ է, որ Սերժ Սարգսյանը ԱՄՆ-ի կողմից Հայոց ցեղասպանությունը չճանաչելու խնդրանքով դիմել է Միացյալ Նահանգների փոխնախագահ Ջո Բայդենին: «Ես կարծում եմ, որ սա քարոզչական երեւույթ է` ցույց տալու համար, որ Հայաստանի արտաքին քաղաքականության մեջ խոսքի եւ գործի միջեւ ինչ-որ տարբերություններ կան: Կարծում եմ՝ առաջիկա ժամերին ԱՄՆ փոխնախագահը պիտի հաղորդագրությամբ հստակեցնի, որ այդ դեպքը չի համապատասխանում իրականությանը: Ինձ համար հարցական է, թե ինչու մինչ այժմ այդ լուրը գաղտնի էր պահվում: Սա հերթական խաղն է՝ Հայաստանի արտաքին քաղաքականությունը վարկաբեկելու համար: Սերժ Սարգսյանը պետք է իր ասելիքը բարձրաձայն ասի»:
Շրխտմյանը նշեց, որ Սերժ Սարգսյանի այցելությունը Լիբանան որոշ մտահոգություններ է առաջացրել, մասնավորապես հայ-թուրքական հարաբերությունների վերաբերյալ, սակայն ժամանակի ընթացքում դրանք որոշ չափով փարատվել են. «Ես կարծում եմ՝ այս ամենը չի համապատասխանում իրականությանը, եւ ես չեմ ուզում մտնել դրանց մեջ»:
Հիշեցնենք, որ համացանցում տեղադրվել է մի տեսանյութ, որտեղ Միացյալ Նահանգների փոխնախագահ Ջո Բայդենը հայկական համայնքից մի երիտասարդի հետ զրույցում ասում է, թե հայ-թուրքական գործընթացի ժամանակ Սերժ Սարգսյանը զանգել է իրեն` ասելով չճանաչել Հայոց ցեղասպանությունը հայ-թուրքական գործընթացի թեժ պահին:
