Հայաստանի արտաքին գործերի նախարարությունը և Եվրամիությունը կազմակերպել են միջազգային սեմինար` «Ազատ տեղաշարժ» թեմայով: Սեմինարը մեկնարկեց այսօր «Գոլդեն Թուլիփ» հյուրանոցում և տևելու է երկու օր: Կազմակերպիչները հույս ունեն, որ սեմինարի ավարտին հայտնի կլինեն այն տեսլականն ու ծրագիրը, որով պետք է առաջ շարժվեն կողմերը` վիզայի ստացման գործընթացը դյուրացնելու համար:
Սեմիննարի բացմանը ելույթ ունեցան Անվտանգության խորհրդի քարտուղար Արթուր Բաղդասարյանը և Եվրահանձնաժողովի ներկայացուցիչ Դաֆնի Գոգուն:
«2009-2010-ի համագործակցության պլանը մենք շատ արդյունավետ իրականացրել ենք: Հատկանշական է հատկապես ազատության, արդարադատության ենթակոմիտեի ստեղծումը»,- իր խոսքում ասաց Արթուր Բաղդասարյանը: Նա նաև հույս ունի, որ սեմինարը կհանդիսանա Հայաստանում վիզայի դյուրացման գործընթացի մեկնարկը:
Բաղդասարյանը կարծում է, որ վիզայի ստացման գործընթացի դյուրացումով մարդիկ օրինական ճանապարհով կմեկնեն Հայաստանից, և կպակասի անօրինական արտագաղթը, որը անհանգստանցում է սեմինարի մասնակից եվրոպացիներին: Հայաստանից հեշտությամբ մեկնելու հարցում Բաղդասարյանը կարևորում է նաև դեսպանատների աշխատանքում փոփոխությունների կատարումը:
«Ճիշտ է, ամեն երկիր ունի իր առանձնահատկությունները, ու ամեն հյուպատոսարան` իր սկզբունքները, սակայն պետք է հնարավորինս նույնականացվի դեսպանատներում վիզայի տրամադրման գործընթացը»,- կարծում է Բաղդասարյանը:
«Հայերը անօրինական արտագաղթի մեծ փորձ ունեն: Մենք այս սեմինարի ընթացքում կներկայացնենք, թե ինչպես է մոտենում ԵՄ-ն այդ հարցին: Այսօրվա քննարկումը նվիրվելու է անօրինական արտագաղթին, ներկայացնելու ենք պրեզենտացիաներ»,- ասում է Դաֆնի Գուգուն:
Վաղվա քննարկումները կնվիրվեն ԵՄ-ի վիզայի ստացման նոր ընթացակարգին, որը մշակվել է անօրինական արտագաղթը վերահսկելու համար: