Բջջային սարքերի հարավկորեական արտադրող LG ընկերությունն իր ապարատներում կներդնի Quick Voice ձայնային օգնականը: Այս մասին գրում է The Verge-ը՝ հղում անելով ընկերության կայքում տարածված հաղորդագրությունը:
Quick Voice-ը թույլ կտա ձայնային հրահանգների միջոցով կառավարել տասնյակ բջջային հավելվածներ, այդ թվում՝ օրացույցը, զարթուցիչը, որոնումը և այլն: Օգնականից կարելի է հարցնել եղանակի տեսությունն ու տեղեկություն ստանալ արժույթի փոխարժեքի մասին:
Ընկերության առաջին սմարթֆոնները, որոնք կունենան ձայնային օգնական, կլինեն Optimus սերիայից: Նախնական շրջանում Quick Voice միայն կորեերեն կհասկանա: Դեռևս հայտնի չէ, ծրագրվու՞մ է նրան այլ լեզուներ սովորեցնել, թե՞ ոչ:
Ձայնային օգնականներ են ներդրված Apple-ի (Siri) և Samsung-ի (S Voice) սմարթֆոններում: Նրանցից և ոչ մեկը չի հասկանում ռուսերեն: Samsung-ը խոստանում է, որ իր ձայնային օգնականը ռուսերեն կհասկանա մինչև տարեվերջ:
LG-ն հանդիսանում է աշխարհում բջջային սարքերի 5-րդ խոշոր արտադրողը: 2012-ի առաջին եռամսյակում հարավկորեական ընկերությունը զբաղեցրել է շուկայի 3,5 տոկոսը՝ զիջելով Samsung, Nokia, Apple և ZTE ընկերություններին: