Ներկա պահին Ուկրաինայի տարածքում գտնվող 6 անձինք դասվում են «օրենքով գող» կատեգորիայի շարքին: Այդ մասին հայտնում են Ուկրաինայի ՆԳՆ կազմակերպված հանցավորության դեմ պայքարի գլխավոր վարչությունից:
Իրավապահների տվյալներով, իրենց հայտնի են բոլոր այդ մարդիկ. նրանց անուններն են՝ «Վասյա Ուշաստնի», «Շարիկ», «Լերա Սումսկի», «Արմեն» և «Ռեզո». նրանք ապրում են Ուկրաինայի տարբեր ռեգիոններում: Եվս երեք «օրենքով գողեր» Ուկրաինայում գտնվում են կալանքի տակ: Եվս մեկը՝ «Արթուրը» դատապարտվել է ցմահ ազատազրկման և կրում է պատիժը: Այդ մասին հայտնում է Дело պարբերականը:
Իրավապահներին նաև հաստատապես հայտնի է, որ Ուկրաինայի քաղաքացի ևս մեկ «օրենքով գող»՝ Խմելոն, պատիժ է կրում Չեխիայում:
Ի դեպ, ազատության մեջ գտնվողների մասին նշենք, որ նրանցից ոմանք մեկ տարի առաջ էին ձեռք բերել «օրենքով գողի» կարգավիճակը. Դեդ Հասան մականունով «օրենքով գող» Ասլան Ուսոյանը 2011-ի մայիսի 12-ին «օրենքով գող» էր ճանաչել տեղի հեղինակություններից 5 անձանց, որոնք չեզոք վերաբերմունք ունեին իր նկատմամբ: Այդ առիթով կազմակերպված «սխոդկային» ներկա էր եղել մոտ 20 գողեր: Արդյունքում նոր քրեական էլիտայի մաս էին կազմել ռուս Օլեգ Ցիրկաչը, բելառուս Սաշա Կուշները, չեչեն Գելանին, դաղստանցի Շամիլը և հայ Արմենը (Արմեն Արմենինը):
Ձևականորեն բոլորի թեկնածություններին նախապես հավանություն էին տվել Դեդ Հասանի կլանի մի շարք օրենքով գողեր, սակայն ամենայն հավանականությամբ վերջնական որոշում կայացնելու անհրաժեշտությունը պայմանավորված էր եղել նրանց ընդդիմախոսների ներկայացրած վերջնագրով: Հիշեցնենք, որ 2011-ի մայիսի սկզբին Ուսոյանի հակառակորդները, ովքեր խմբվել էին «օրենքով գող» Մերաբ Ջանգվելաձեի շուրջը, սպառնացել էին հաշվեհարդար տեսնել բոլոր նրանց նկատմամբ, ովքեր մասնակից կլինեն Դեդ Հասանի կողմից անցկացվող «թագադրումներին»: Հավանաբար, հանցաշխարհի պատրիարքը առանց հապաղելու ընդունել էր հակառակորդների մարտահրավերը՝ համոզվելու, թե որքանով է նրանց խոսքը գործին համապատասխանում:
Նշենք նաև, որ իրավապահների տեղեկություններով, վերջին երկու տարվա ընթացքում Ուկրաինայից արտաքսվել կամ «էքստրադիցիայի» է ենթարկվել 16 «օրենքով գող»՝ 7 անձ 2010թ-ին, ևս 9-ը՝ 2011-ին: Այս տարվա սկզբին, պաշտոնական տվյալներով, ոստիկանները «դադարեցրել են» մեկ «օրենքով գողի»՝ «Վալտերի» հանցավոր գործունեությունը: ՆԳՆ-ից թերթերից մեկին պարզաբանել են, որ այդ կատեգորիայի երկրից արտաքսված բոլոր անձանց 5 տարով արգելվել է վերադառնալ Ուկրաինա:
Միաժամանակ իրավապահները նշել են, որ պայքարել այդպիսի երևույթի դեմ, ինչպիսին «Օրենքով գող»-ն է, դժվար է: Չէ՞ որ նրանք խոստովանելով իրենց կապերը հանցաշխարհի հետ, իրենք անձամբ չեն կատարում հանցագործություններ: Թեև միլիցիային հայտնի է, որ նրանք ղեկավարում կամ կոորդինացնում են հանցախմբերի գործունեությունը: Հենց իրենց խոստովանությամբ, ոստիկանների՝ «օրենքով գողերի» դեմ պայքարի ամենագործուն մեթոդն առայժմ այն հանցախմբերի դեմ պայքարն է, որոնց հետ նրանք կապված են: Այդպես «օրենքով գողերը» կորցնում են իրենց ազդեցությունը:
Իրավապահները կիրառում են նաև այդ անձանց Ուկրաինայի քաղաքացիությունից զրկելու մեթոդը, բայց դժվար է, քանի որ դա կարելի է անել միայն այն դեպքում, եթե քաղաքացիություն է ձեռք բերել անօրինական ճանապարհով:
Հիշեցնենք, որ ընդդիմության պատգամավոր, Ուկրաինայի ՆԳ նախկին ղեկավարի համերկրացի Գենադի Մոսկալը առաջարկել է օրենքով ամրագրել և քրեական պատասխանատվության ենթարկել նրանց՝ հենց «օրենքով գող»-ի ստատուս կրելու համար: Մոսկալն այդպիսի առաջարկ անելով, հաշվի է առել այն, որ հանցաշխարհի կանոններով «օրենքով գողը» պետք է հրապարակավ ընդունի այդ ստատուսը և չպետք է խուսանավի դրանից նույնիսկ միլիցիայի բաժնում հարցաքննվելիս:
Պատգամավորն իր օրինագծով առաջարկել է՝ որդեգրել Վրաստանի փորձը, որտեղ կիրառման մեջ էր դրվել նույնականացման փաստաթուղթը, որով էականորեն հեշտացել է պայքարն այդ կատեգորիայի հանցագործների դեմ: Ավելի վաղ Մոսկալը հայտարարել էր, որ «օրենքով գողերը»՝ խայտառակություն են Ուկրաինայի համար:
Թարգմանությունը՝ Է. Մարտիրոսյանի
