Նոր Նորքի առաջին զանգվածում, որտեղ գտնվում է մեծ մարդասեր Ֆրիտյոֆ Նանսենի անվան այգին, կկառուցվի նաև նրա թանգարանը։ Թանգարանը կզբաղեցնի 53 քկմ տարածք՝ հենց այգում։ Այսօր լրագրողների հետ հանդիպմանը Նանսենի հիմնադրամի նախագահ Ֆելիքս Բախչինյանն ու քաղաքապետարանի ներկայացուցիչ, ճարտարապետ Արբակ Վարդանյանը հերքեցին շրջանառվող այն բոլոր լուրերը, թե իբր թանգարանի փոխարեն այլ շինություն է կառուցվելու։
Պրն Վարդանյանն ասաց, որ քաղաքապետարանում դեռևս անցած տարվանից քննարկվել է այս հարցը, ներկայացվել են նախագծեր, հաղթել է ճարտարապետ Ալբերտ Սոխիկյանի նախագիծը։ Թանգարանը պատրաստ կլինի մինչև Նանսենի ծննդյան օրը՝ հոկտեմբերի 10-ը, որով և կփակվի նանսենյան տարին. «Թանգարանը մեկհարկանի է, զուսպ ճարտարապետությամբ։ Մենք որևէ ծառ կամ կանաչ տարածք չենք վնասելու»,- հավելեց պրն Վարդանյանը։
Անդրադառնալով հնչած բողոքներին՝ Ֆելիքս Բախչինյանն ասաց, որ Նանսենն իրոք բախտ չունի. «Մենք ավելի վաղ պիտի Նանսենի թանգարանը կառուցած լինեինք։ Մի մարդ, ով Նոբելյան մրցանակի դափնեկիր էր, չի ամաչել և փող է մուրացել հայերի համար։ Շուրջ 320 հազար փախստականների Նանսենյան անձնագրեր է տվել, նրանց պարգևել է երկրորդ կյանք։ Այս դեպքում նման խոսակցություններն ուղղակի ամոթ են»։
Նշենք, որ թանգարանը կառուցվում է բարերարներ Կառլեն և Սառա Եսայանների միջոցներով։
Ֆելիքս Բախչինյանը վերջում հավելեց, որ մինչև իր կյանքի վերջը պիտի ի մի բերի Նանսենի մասին բոլոր գրքերը, մոտակա 10 տարիների ընթացքում դեռևս 30 հատոր պիտի տպագրվի, իսկ 20 հատոր արդեն տպագրվել է։
