Կոալիցիոն երիցուկը. «սիրում է-չի սիրում»

Իշխանական ճամբարում ընթացող պրոցեսները հետաքրքիր տրամաբանությամբ են զարգանում. նախ հրապարակայնորեն ՀՀԿ-ն ու ԲՀԿ-ն միմյանց հասցեին հոխորտում, իրար դեմ սուր են ճոճում` չհաշված միջանցքներում միմյանց հասցեին դժգոհությունները, իսկ հետո հայտարարում, որ կոալիցիայում չկան հակասություններ, կոալիցիան միահամուռ է ու միակամ:
Տարրական տրամաբանությունը հուշում է, որ միահամուռ կոալիցիայում չպետք է լինեն նման վեճեր: Իսկ եթե այդ երեւույթները, այնուամենայնիվ, կան, նշանակում է՝ կա՛մ կոալիցիայում իրոք «արշալույսները խաղաղ չեն», կա՛մ այս ամենը պայմանավորված խաղ է, որի արդյունքում ՀՀԿ-ն նպատակ ունի ԲՀԿ-ին ներկայացնել զոհի, հալածյալի կերպարանքով՝ առաջիկա ընտրություններում ընդդիմությունից, մասնավորապես՝ Հայ Ազգային Կոնգրեսից ձայներ պոկելու համար:
Այս երեւույթը մեկնաբանելու համար դիմեցինք ԲՀԿ նախագահ Գագիկ Ծառուկյանի մամլո խոսնակ Խաչիկ Գալստյանին: Վերջինս, բնականաբար, հայտարարեց, թե ԲՀԿ-ի եւ ՀՀԿ-ի միջեւ հակասություններ չկան: «ՀՀԿ-ն ու ԲՀԿ-ն կոալիցիոն գործընկերներ են, տարբեր քաղաքական ուժեր, բնականաբար, տարբեր լինելով հանդերձ` նրանց միջեւ կա մրցակցության տարր», – հայտարարեց Խաչիկ Գալստյանը: Իսկ ՀՀԿ հայտարարություններն այն մասին` թե ուզեն, կուժեղացնեն ԲՀԿ-ին, ուզեն՝ կթուլացնեն, ըստ Խաչիկ Գալստյանի, պարզապես պահի տակ ասված խոսքեր են: Ուստի իրենք նորմալ են վերաբերվում նման էմոցիոնալ պոռթկումներին: «Դրանք առանձին անհատների առանձին տեսակետներ են եղել, մարդիկ, որոնք պահի ազդեցության տակ գնահատականներ են տվել: Մենք մեր գործընկեր կուսակցության՝ ՀՀԿ կողմից պաշտոնական նման հայտարարություններ չունենք, այլ ունենք տարբեր մարդկանց տարբեր հայտարարություններ, եւ այդ հայտարարությունները մեր կողմից համարժեք պատասխան են ստացել: Ուստի` մենք միշտ կոչ ենք անում մեր քաղաքական գործընկերներին նման հայտարարություններում լինել զգույշ, զուսպ եւ կոռեկտ», – բավական թափանցիկ կերպով ՀՀԿ-ին անզգուշության ու էմոցիայի ազդեցության տակ հայտարարություններ անելու մեջ մեղադրեց Ծառուկյանի մամլո խոսնակը: Ինչ վերաբերում է Սերժ Սարգսյանի հաճախորդներից ՕԵԿ-ի սցենարը ԲՀԿ դեպքում կիրառելու հավանականությանը, երբ նրանց գործուղեցին ընդդիմադիր դաշտ, ընդդիմությունից քվեներ պոկեցին, այնուհետեւ հարմար պահի հաճախորդը վերադարձավ իր տիրոջ մոտ՝ դառնալով նրա կցորդը, ապա Խաչիկ Գալստյանը նշեց, թե պատմությունը կրկնություններ չի սիրում: Իսկ մեր հարցին, թե բացառո՞ւմ եք, որ ընդդիմություն դառնաք` պատասխանեց. «Այս պահին՝ այո՛, մենք շարունակում ենք մեր կոալիցիոն պարտավորությունները, եւ ԲՀԿ-ն ձգտում է գալու իշխանության»:
ՀՀԿ խմբակցության պատգամավոր Հովհաննես Սահակյանը նորմալ համարեց ՀՀԿ-ական գործիչների հայտարարությունները՝ պնդելով, որ դրանք տեղավորվում են քաղաքական տրամաբանության մեջ: Ավելին, ըստ ՀՀԿ-ական պատգամավորի, այդ հայտարարությունները չեն կարող լուրջ հիմքեր դառնալ երկու կուսակցությունների միջեւ հակասությունների համար: ՀՀԿ-ական պատգամավորը պատկերավոր նկարագրեց նաեւ ՀՀԿ-ի եւ ԲՀԿ-ի երկխոսությունը: «Քաղաքականորեն զրուցում են: Նրանք ասում են, թե՝ տեսեք, տեսեք, մենք ենք: ՀՀԿ-ական պատգամավորներն էլ ասում են, թե չէ, առաջին քաղաքական ուժը մենք ենք, առաջիկայում բազմապատկելու ենք մեր տեղերը»: Ու ըստ պարոն Սահակյանի` այնուամենայնիվ, ՀՀԿ-ն այսօր առաջին քաղաքական ուժն է ՀՀ-ում, ամենամեծ ներկայությունն ունի խորհրդարանում, Սերժ Սարգսյանը ՀՀԿ-ական է: Սահակյանի բնութագրմամբ՝ ՀՀԿ-ն քաղաքական դաշտում գեներալի կարգավիճակ ունի: «Եվ նորմալ եմ համարում, որ յուրաքանչյուր զինվոր ձգտում է գեներալ դառնալուն: Մենք ընդունում ենք, որ դա նորմալ է, բայց քանի դեռ ՀՀԿ-ն առաջինն է, թիվ մեկն է, չի պատրաստվում իր գեներալական տեղը զիջել զինվորներին, սպայական կազմին կամ նոր բարձրացող քաղաքական ուժերին», – նման համեմատություն ու թափանցիկ ակնարկներ արեց Հովհաննես Սահակյանը: Նա նշեց, որ չի կարող ասել՝ ԲՀԿ-ն առաջիկայում ինչ քաղաքական ուղղվածություն կորդեգրի: «Սակայն չեմ կարծում, որ նրանք կողմնորոշվեն դեպի Լեւոն Տեր-Պետրոսյան: Նրանք կարող են առանձին ընդդիմություն լինել, բայց երբ Կոնգրեսին միանալ-չմիանալու երկընտրանք առաջանա, ինչպես նախագահական ընտրությունների ժամանակ նման հարց էր դրված ՕԵԿ-ի առաջ, ապա չեմ կարծում, որ նրանք միանալու ճանապարհը կընտրեն», – հայտարարեց Սահակյանը: Իսկ թե որքանո՞վ է հավանական, որ ԲՀԿ-ն դառնա ընդդիմություն, վերջինս դժվարացավ պատասխանել: «Քանի դեռ մենք աշխատում ենք, կառավարությունը, կոալիցիան փլուզված չեն, քանի դեռ կառավարությունում ԲՀԿ-ն ներկայացված է, ուրեմն՝ կարելի է ենթադրել, որ նրանք ընդդիմություն չեն»: