ԱՄՆ նախագահ Բարաք Օբաման Մեքսիկայում ավարտված «Մեծ քսանյակ»-ի գագաթնաժողովից հետո ամփոփել է դրա արդյունքները։ Միացյալ Նահանգների նախագահը նշել է, որ վստահ է՝ եվրոպացիներն ի վիճակի են հաղթահարելու ներկայի տնտեսական ճգնաժամը։ Այս մասին հաղորդում է «Ազատություն» ռադիոկայանը։
Նրա խոսքերով՝ ԵՄ ղեկավարությունը ըմբռնումով է մոտեցել աշխարհի առաջնորդների մտահոգություններին, որոնք կապված են եվրոպական մայրցամաքում առկա տնտեսական ծանր ճգնաժամի հետ։ Միաժամանակ Օբաման ասել է, որ եվրոպական գործընկերներն ունեն բավարար ռեսուրսներ՝ ճգնաժամը հաղթահարելու համար, և դա կարող են անել սեփական ուժերով։ Այս հայտարարությունից հետո փորձագետները կարծիք են հայտնել, որ ԱՄՆ-ը չի ցանկանում ֆինանսական օգնություն ցուցաբերել ԵՄ-ին։
Նա նաև անդրադարձել է սիրիական ճգնաժամին՝ նշելով, որ Ռուսաստանն ու Չինաստանը հասկանում են այդ երկրում քաղաքացիական պատերազմի սկսման վտանգը, սակայն թե՛ Մոսկվան և թե՛ Պեկինն այս պահին պատրաստ չեն քննարկելու Սիրիայի նախագահ Բաշար Ալ-Ասադի՝ իշխանությունից հեռացման հարցը։
