ԳԹԿ-ն ՀՀ կառավարությունից հանձնարական է ստացել կազմել շտեմարաններ երկու մեծ առարկաների գծով՝ «Հայոց լեզու և հայ գրականություն» և «Մաթեմատիկա»: ԳԹԿ դիմել է հանրապետության բոլոր կրթության վարչություններին, վերջիններս խնդրանքով դիմել են բոլոր դպրոցներին և համապատասխան առարկաների ամբիոններին, որպեսզի ներկայացնեն այդ առարկաների շտեմարանները, իր հերթին՝ ԿԳ նախարար Արմեն Աշոտյանը դիմել է բոլոր դպրոցներին՝ շտեմարանները կազմելուն աջակցելու խնդրանքով։ Այս առարկաներից թեստեր կազմելու համար աշխատանքային խումբ է ձևավորվել, որը բավական երկար ժամանակ է աշխատել։
«Շտեմարանների երրորդ հատորի լույս ընծայումից հետո ԳԹԿ-ն խնդրանքով դիմեց բոլոր մասնագետներին. եթե նկատել են որոշակի վրիպակներ առաջադրանքներում, որոնք ենթակա են վերանայման և այլն, դիմել ԳԹԿ, որպեսզի թեստերում այդպիսի առաջադրանքները տեղ չգտնեն, դրանից կշահեր թեստը և դիմորդը: Բողոքարկման պատկերը ցույց տվեց, որ թեստում վրիպակներով առաջադրանքներ չէին ընդգրկվել»,- «Առաջին լրատվական»-ի հետ զրույցում ասաց ԳԹԿ մամլո խոսնակ Գայանե Մանուկյանը՝ շարունակելով, որ շտեմարանային աշխատանքները շարունակվելու են, որովհետև այդ առաջադրանքները տարեցտարի պետք է համալրվեն։
Անդրադառնալով խոսակցություններին, թե «Հայոց լեզու և հայ գրականություն» առարկայից թեստերի արտահոսք է եղել՝ նա ասաց, որ ԳԹԿ-ն ոչ կարող է հաստատել թեստերի արտահոսքը, ոչ կարող է հերքել։ Նա նշեց, եթե նման փաստեր գոյություն ունեն, ոչ թե պարզապես հայտարարությունների կարգով, այլ փաստերով դիմեն համապատասխան մարմիններին։ Գայանե Մանուկյանի խոսքով՝ եթե առանց փաստերի ենք խոսսում, կարող է դիտվել որպես զրպարտություն, քանի որ քննություններից անցել է տասը օր, իսկ դրա մասին խոսակցություններ են շրջանառվում այս օրերին։
«Ինչպես գիտենք, քննության ավարտից մեկուկես ժամ հետո ԳԹԿ-ն իր պաշտոնական կայքում տեղադրում է քննական թեստերն իրենց պատասխաններով: Եթե հետո առաջանում են ծածկագրեր, դա կարող է լինել զրպարտություն, կամ համապատասխան մարմիններ պետք է դիմել: Մենք ևս շահագրգռված ենք, որովհետև քննությունների կազմակերպիչ ենք և, բնականաբար, չենք ցանկանա, որ որևէ դեպք ստվերի քննական այս գործընթացները»,- մեկնաբանեց Գայանե Մանուկյանը՝ հավելելով, որ ԳԹԿ-ն թեստ կազմող խմբերի մասնագետների հետ կնքում է պայմանագիր․ այնտեղ կա մի կետ, որն արգելում է նախքան քննությունները որևէ մեկին ներկայացնել թեստի բովանդակությունը, այլապես այդ անձը պատասխանատվության է ենթակա, այսինքն՝ եթե խախտվել է, և կան փաստեր, պետք է դիմել համապատասխան մարմիններին։
