Նկատի ունենալով Ֆրանսիայի նորընտիր նախագահ Ֆրանսուա Օլանդի՝ Հայոց ցեղասպանության ժխտումը քրեականացնող օրենքի ընդունման մասին հայ համայնքին տված խոստումը և խորհրդարանական ընտրություններում նրա կուսակցության հաղթանակը, կարելի է եզրակացնել, որ հայկական օրինագիծը կընդունվի ֆրանսիական Սենատի կողմից: «Առաջին լրատվական»-ի հետ զրույցում նման տեսակետ հայտնեց Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանը:
«Հավանական եմ համարում, որ մինչև հաջորդ տարի ապրիլի 24-ը Ֆրանսիայի Սենատը կքննարկի և կընդունի այդ օրինագիծը: Բայց այժմ երկու-երեք տարբերակ կա: Նախ՝ Սենատը նման օրինագիծ ընդունելիս ստիպված է այն ներկայացնել սահմանադրական խորհրդին և հարգել վերջինիս որոշումը: Իմ համոզմամբ՝ Ֆրանսուա Օլանդն ուզում է, որ նախագիծը ներկայացվի կառավարության, ոչ թե Ֆրանսիայի խորհրդարանի կողմից: Ընդ որում, կարևոր է, որ նախագիծը հենց կառավարության կողմից ներկայացվի:
Հայկական օրինագծի ներկայացմանը զուգահեռ՝ Օլանդը ցանկանում է վերսկսել Թուրքիայի հետ բանակցությունները, այն է՝ չարգելել վերջինիս անդամակցությունը ԵՄ-ին»,- կարծիք հայտնեց Կայծ Մինասյանը:
Հարցին՝ արդյո՞ք Ֆրանսիայի նորընտիր նախագահը կշարունակի Թուրքիայի հանդեպ վարած Նիկոլա Սարկոզիի քաղաքականությունը, թե նոր էջ կբացի, քաղաքագետը վստահություն հայտնեց, որ առավել հավանականը երկրորդ տարբերակն է: «Միաժամանակ, Ֆրանսուա Օլանդը Թուրքիայի առջև պայմաններ կդնի: ԵՄ-ին այդ երկրի անդամակցության մասով Օլանդն ու իր թիմակիցները տարբեր կարծիքներ ունեն. կուսակցության մի կեսը համաձայն է Թուրքիայի՝ ԵՄ անդամակցությանը, մյուս կեսը՝ դեմ»:
Ամփոփելով՝ Կայծ Մինասյանը նկատեց, որ հայկական օրինագիծը Ֆրանսիայի Սենատ կներկայացվի սեպտեմբեր-հոկտեմբեր ամիսներին:
