Քուվեյթի էմիր Սաբախ Ալ-Ահմադ Ալ-Սաբախը մեկ ամսով դադարեցրել է խորհրդարանի աշխատանքը։ Հունիսի 18-ին այս մասին հաղորդում է Reuters-ը՝ հղում անելով KUNA քուֆեյթական տեղեկատվական գործակալությանը:
Ալ-Սաբախը որոշումն ընդունել է երկրի ՆԳ նախարար Ահմադ Ալ-Խամուդ Ալ-Սաբախի խորհրդարան այցի նախօրեին։ Վերջինս կառավարությունում ամենաազդեցիկ մարդկանցից մեկն է և իշխող դինաստիայի անդամ է: Ընդդիմադիր պատգամավորները, ովքեր Քուվեյթի օրենսդիր մարմնում մեծամասնություն են, նախատեսել էին քաղաքացիություն տալու վերաբերյալ հարցեր ուղղել նախարարին: Բացի այդ, խորհրդարանականները ենթադրում են, որ Քուվեյթի շատ քաղաքացիներ երկքաղաքացիություն ունեն, ինչը հակասում է ազգային օրենսդրությանը:
Գործակալությունը ենթադրում է, որ էմիրի որոշումն ընդունվել է երկրում քաղաքական ճգնաժամը կանխելու և կառավարության ու պատգամավորների միջև բանակցություններ անցկացնելու համար: Այն համապատասխանում է Սահմանադրությանը, որը թույլ է տալիս պետության ղեկավարին դադարեցնել խորհրդարանի աշխատանքը մինչև մեկ ամիս ժամկետով:
Associated Press-ը նշում է, որ խորհրդարանի աշխատանքը վերսկսվելուց մի քանի օր անց կսկսվի մուսուլմանների համար սրբազան ամիսը` Ռամադանը:
