Անգլերենի միասնական քննությունների վերաբերյալ ԳԹԿ-ն բողոքներ չի ստացել: Այսօր «Առաջին լրատվական»-ի հետ զրույցում այս մասին տեղեկացրեց ԳԹԿ մամլո խոսնակ Գայանե Մանուկյանը` պատասխանելով այն հարցին, թե ինչու են դիմորդները բողոքում թեստերի բարդությունից:
Ըստ Գայանե Մանուկյանի` քննական կարգի համաձայն՝ երբ պաշտոնապես հրապարակվեն միասնական քննությունների արդյունքները, հաջորդ օրը քննակենտրոններում տեղի կունենա քննությունների արդյունքների բողոքարկումը: «Երբ մենք ստանանք բողոքարկումները, լիարժեք տեղեկատվություն կտրամադրենք, թե ինչ բնույթի են եղել դրանք: Որպես այդպիսին ԳԹԿ-ն որևէ բողոք չի ստացել»,- հստակեցրեց ԳԹԿ ներկայացուցիչը` հավելելով, որ կան բողոքարկումներ, որոնք սուբյեկտիվ են, և վերջիվերջո խոսուն են թվերը` միջին միավորները, կտրվածների թվերը և ստացած միավորները, որոնք, Գայանե Մանուկյանի խոսքերով՝ բնորոշում են թեստի բարդ կամ պարզ լինելը:
Հիշեցնենք, որ անգլերենի միասնական քննություն հանձնած դիմորդները բողոքում են քննության թեստերի բարդությունից: Դիմորդներից մեկը նաև նամակով դիմել է ՀՀ կրթության և գիտության նախարար Արմեն Աշոտյանին:
