Ադրբեջանական APA լրատվական գործակալության փոխանցմամբ՝ Ադրբեջանում Թուրքմենստանի դեսպան Տոյլի Կոմեկովը կանչվել է ԱԳՆ՝ կապված «Քյափազ» (թուրքմենական անվանումը՝ «Սերդար») նավթահանքում սեյսմիկ աշխատանքների սկսման հետ: Այդ հանքավայրը գտնվում է Կասպից ծովի ադրբեջանական ու թուրքմենական հատվածների սահմանագծում:
Ադրբեջանի ԱԳՆ մամլո ծառայության հաղորդմամբ՝ ԱԳՆ-ում Ադրբեջանի փոխարտգործնախարար Խալաֆ Խալաֆովը դեսպանին հայտնել է, որ 2008 թվականին Ադրբեջանի ու Թուրքմենստանի միջև ձեռք բերված պայմանավորվածության համաձայն՝ երկու երկրները չպետք է որևէ հետախուզական կամ արդյունահանման գործունեություն ծավալեն միմյանց սեկտորների սահմանագծում՝ նախքան Կասպից ծովի հատակի բաժանման վերաբերյալ համաձայնագրի կնքումը:
Խալաֆովը հայտարարել է, որ թուրքմենական կողմը խախտել է այդ պայմանավորվածությունը, ինչն ադրբեջանական կողմի համար անընդունելի է, և ադրբեջանական կողմն իրեն իրավունք է վերապահում Կասպից ծովում իր ինքնիշխան իրավունքների պաշտպանության համար ձեռնարկել համապատասխան միջոցներ:
