Եվրոպացի քաղաքական գործիչները շատ բան չգիտեն Ուկրաինայի ընդդիմության առաջնորդ Տիմոշենկոյի գործի մասին: Այսպես է Ուկրաինայի գլխավոր դատախազի առաջին տեղակալ Ռենատ Կուզմինն արձագանքել Եվրախորհրդարանի նախկին ղեկավար Եժի Բուզեկի ու Եվրամիության արտաքին քաղաքականության և անվտանգության հարցերով գլխավոր հանձնակատար Քեթրին Էշթոնի այն հայտարարությանը, որ Տիմոշենկոյի գործը քաղաքական է: Այս մասին հայտնում է ITAR-TASS-ը:
«Նրանցից ոչ մեկը չի ուսումնասիրել գործի իրավական կողմը, չգիտի ներկայացված մեղադրանքների ու դատավճռի էությունը:
Բոլորը զբաղվում են քաղաքական գնահատականներով ու հիմնականում մեզ հետ խոսում են քաղաքական կարգախոսներով: Դեմոկրատիայի մասին պատմությունները, ըստ իս, վարագույր են այն բանի համար, որ թաքցվի իրերի իրական էությունը»,- ասել է Կուզմինն այսօր «Կոմերսանտ-Ուկրաինա» թերթին տված հարցազրույցում:
«Տիմոշենկոյի գործն ունի երկու բաղադրիչ` իրավական ու քաղաքական: Իրավականը բոլոր իրավաբաններին հասկանալի է, ու ոչ ոքի մոտ կասկած չի հարուցում Տիմոշենկոյի հանցագործ լինելը: Նրա մասնակցությունը հանցագործությանը երկու դատական ատյաններով ապացուցվել է»,- ընդգծել է Ուկրաինայի գլխավոր դատախազի առաջին տեղակալը:
Կուզմինը հիշեցրել է, որ Ուկրաինան եվրոպացիներին առաջարկել է ուղարկել իրավաբաններ, որպեսզի նրանք ուսումնասիրեն Տիմոշենկոյի գործը: