Իսրայելն սկսկել է իր տարածքից արտաքսել Հարավային Սուդանի անօրինական նեգաղթյալներին,- գրում է The Jerusalem Post-ը: Հունիսի 17-ի երեկոյան Թել Ավիվից Ջուբա է թռել 123 սուդանցիների տեղափոխող ինքնաթիռը: Նրանց հետ եղել են նաև 4 հարավսուդանցի դիվանագետներ, որոնք հետևել են արտաքսման աշխատանքներին:
Ավել վաղ Իսրայելի ներքին գործերի նախարար Էլի Իշայը հայտարարել էր, որ իրենք պատրաստվում են երկրից վտարել 700-1500 հարավսուդանցի ներգաղթյալների: Իսրայելի իշխանությունների հաշվարկներով՝ երկրում ապրում են ևս 30 հազար անօրինական ներգաղթյալներ Էրիթրեայից, 15 հազար՝ Հյուսիսային Սուդանից: Անօրինական ներգաղթյալների դեմ պայքարի շրջանակներում նրանք նույնպես կարտաքսվեն երկրից:
Ընդհանուր առմամբ, Իսրայելում ապրում է 60 հազար ներգաղթյալ աֆրիկյան երկրներից, որոնք երկիր են մտել 2005 թվից հետո եգիպտական սահմանով: Իշայի խոսքերով՝ ներգաղթյալների արտաքսումը իսրայելցիների «ազգային շահերից» է բխում: Նա ընդգծել է, որ ընտրություն կատարելով իսրայելցիների և սուդանցիների միջև՝ ինքը նախընտրել է իր քաղաքացիների շահերը:
Այս պահին Իսրայելում օրինական հիմքեր չկան Հյուսիսային Սուդանի կամ Էրիթրեայի քաղաքացիներին արտաքսելու համար, քանի որ նրանց այնտեղ ձերբակալություններ և հաշվեհարդարներ են սպասվում: Պաշտոնապես, Իսրայել մտնելով, նրանք այստեղ ստացել են փախստականի կարգավիճակ, սակայն, ըստ էության, դրանով նրանք ոչ մի իրավունք չեն ստացել:
Այդ պատճառով Իսրայելն իրականացնում է կամավոր հայրենիք վերադարձնելու քաղաքականություն: Միգրացիոն վարչությունից հայտնել են, որ չափահաս ներգաղթյալները հայրենիք վերադառնալու համար ստացել են 1300 դոլար, իսկ երեխաները՝ 500: Նրանց թույլատրել են իրենց հետ վերցնել 50 կգ բեռ: Շատերը գերազանցել են այդ սահմանը և ստիպված եղել դրա մի մասը թողնել օդանավակայանում: Այնպես որ, Իսրայելի իշխանություններն այժմ պետք է որոշեն՝ ինչպես վարվել այդ իրերի հետ՝ լրացուցիչ չվերթով ուղարկել Ջուբա՞, թե՞ թողնել Իսրայելում:
Իսրայելի վարչապետ Բենյամին Նեթանյահուն հունիսի 17-ին տեղի ունեցած կառավարության նիստին հայտարաել է, որ Իսրայելը հետագայում պետք է իրականացնի ավելի խիստ միգրացիոն քաղաքականություն:
