Քիչ առաջ առողջապահության նախարարությունում ՀՀ վարչապետ Տիգրան Սարգսյանը նախարարության աշխատակիցներին ներկայացրեց նորանշանակ նախարար Դերենիկ Դումանյանին: Տիգրան Սարգսյանը համոզված նշեց, որ առողջապահության ոլորտում շատերը ճանաչում են նրան, քանի որ Դերենիկ Դումանյանը այս ոլորտում հայտնի է իր անցած ճանապարհով, փորձով, գիտելիքներով և համակարգի մասնագետների վստահությամբ, ինչը վարչապետը կարևորեց:
Տիգրան Սարգսյանը չմոռացավ շեշտել, որ Դերենիկ Դումանյանը նաև քաղաքական գործիչ է, ՀՀԿ գործադիր մարմնի անդամ: «Մենք շատ լավ պատկերացնում ենք նրա կազմակերպչական, մարդկային հատկանիշները, թույլ տվեք շնորհավորել նրան»,- նշեց Տիգրան Սարգսյանը:
Վարչապետը շնորհակալություն հայտնեց ՀՀ առողջապահության նախկին նախարար Հարություն Քուշկյանին, որը, ըստ վարչապետի, բացակայում է հանրապետությունից:
Իր հերթին, նորանշանակ նախարար Դերենիկ Դումանյանը շնորհակալություն հայտնեց ՀՀ վարչապետին և նախագահին նման բարձր վստահության համար։ «Ես կաշխատեմ արդարացնել այդ վստահությունը։ Ցանկանում եմ շնորհակալություն հայտնել նաև ՀՀԿ գործադի մարմնին իմ թեկնածությունն առաջադրելու համար։ Մենք մեծ անելիքներ ունենք, հարգելի կոլեգաներ»,- եզրափակեց իր խոսքը Դումանյանը՝ դիմելով աշխատակիցներին:
