ՀՀ նախկին վարչապետ, ներկայում ԱԺ ՀՀԿ-ական պատգամավոր Խոսրով Հարությունյանի կարծիքով՝ կառավարության կազմի ձևավորման հարցում 2 հիմնական մոտեցում է եղել գերակա: Առաջինը՝ այդուհանդերձ կառավարությունը իր գործունեության նախորդ շրջանում հիմնականում չի ձախողվել, նույնիսկ ճգնաժամի ծանր շրջանում, և երկիրը զերծ է պահել ցնցումներից, ինչպիսին Հունաստանում էր, Իռլանդիայում և այլն: «Առաջին լրատվական»-ի հետ զրույցում Խ. Հարությունյանը նշեց, որ ճգնաժամի պայմաններում կառավարության գործունեությունը գնահատվում է ոչ այնքան ձեռքբերումներով, որքան նրանով, թե ինչքանով հաջողվեց կորուստներ չունենալ, և այդ առումով ՀՀ կառավարությունը նույնպես «արդարացրել է իրեն, քանի որ ոչ մի սոցիալական ծրագիր չի ձախողել»:
Ըստ Խ. Հարությունյանի՝ երկրորդ գործոնն այն է, որ կառավարությունը պետք է ձևավորվի առաջիկա 7-8 ամիսների համար, քանի որ նախագահական ընտրություններից հետո կառավարությունը, Սահմանադրության պահանջի համաձայն, պետք է նորից իր լիազորությունները վայր դնի, և այդ իսկ պատճառով կտրուկ փոփոխություն կատարել կառավարության կազմում կարիք չկար:
«Կառավարության գործունեության ծրագիրը, որ այժմ քննարկումների փուլում է, բավականին համարձակ ծրագիր է, և իր առջև դնում է շատ հավակնոտ թիրախային նպատակներ թե՛ աշխատատեղերի ստեղծման, թե՛ տնտեսական քաղաքականության մեջ պետության կարգավորիչ դերի, թե՛ սոցիալական իրավիճակը մեղմելու, սոցիալական բևեռացվածության մակարդակը մեղմելու, թե՛ որակական լուրջ փոփոխություններ բերելու առումով: Կառավարությունը վճռական է այդ նպատակներն իրականացնելու: Մյուս կողմից՝ խորհրդարանական ընտրությունները ցույց տվեցին, որ հանրությունն այսօր տրտնջում է ոչ այնքան նպաստի ցածր մակարդակից, որքան հանրային կյանքում առկա անարդարություններից: Հանրային կյանքը լուրջ առողջացման կարիք ունի: Այլևս այսպես հնարավոր չէ: Պետք են փոփոխություններ, որոնք կբերեն անպատժելիության վերացմանը, կոռուպցիայի կրճատմանը, հովանավորչության վերացմանը, ազատ մրցակցային միջավայրի ձևավորմանը և ՓՄՁ կայացմանը: Կառավարության գործունեության ծրագիրը այդ հանրային մտահոգությունների ադեկվատ պատասխանն է»,- ասաց Խ. Հարությունյանը:
