Ռուսաստանի արտգործնախարար Սերգեյ Լավրովը և ՄԱԿ-ի ու ԱՊԼ հատուկ բանագնաց Քոֆի Անանն այսօր հեռախոսազրույց են ունեցել, որում քննարկել են Սիրիայի հարցով միջազգային համաժողով անցկացնելու հնարավորությունը: Այս մասին հաղորդում է RIA Novosti-ն՝ վկայակոչելով Ռուսաստանի ԱԳՆ մամուլի ծառայությունը:
Հաղորդագրության մեջ նշվում է, որ զրույցը տեղի է ունեցել Անանի նախաձեռնությամբ:
«Քննարկվել է Ռուսաստանի նախաձեռնությամբ Սիրիայի վերաբերյալ միջազգային համաժողով անցկացնելու հեռանկարը: Սերգեյ Լավրովը, որպես դրա բարեհաջող անցկացման նախապայման, առաջ է քաշել համաժողովի աշխատանքներին տարածաշրջանային առաջատար պետությունների ներգրավման անհրաժեշտությունը»,- ասվում է հաղորդագրության մեջ:
Փաստաթղթում նշվում է, որ Ռուսաստանի արտգործնախարարը ևս մեկ անգամ շեշտել է, որ համաժողովի նպատակը պետք է լինի Սիրիայում արյունահեղության դադարեցմանն ուղղված համագործակցությունը և քաղաքական գործընթացի ձևավորումը, որի շրջանակներում սիրիացիներն իրենք պետք է որոշում կայացնեն իրենց պետության ապագայի վերաբերյալ:
«Քոֆի Անանը պաշտպանել է Սիրիայի ճգնաժամի կարգավորմանը համաձայնեցված միջազգային մոտեցում ցուցաբերելու անհրաժեշտությունը»,- ասվում է հաղորդագրության մեջ:
Հիշեցնենք, որ ապրիլի կեսերից Սիրիայի ճգնաժամի կարգավորման ուղղությամբ աշխատանքներ է տանում Քոֆի Անանը: Սակայն նրա առաջարկած խաղաղության ծրագիրը հակամարտության երկու կողմերն էլ պարբերաբար խախտում են:
