«Մենք շարունակում ենք հետևել զարգացումներին, և եթե վարույթ է հարուցված, մենք ակնկալում ենք, որ կլինի միջազգային ստանդարտներին համապատասխան, օրենքի գերակայության սահմաններում, և պրն Օսկանյանի ու «Սիվիլիթաս»-ի հետ կապված ամեն ինչը կկատարվի թափանցիկ, արդար ձևով»,- այսօր լրագրողների հետ ճեպազրույցի ժամանակ հայտարարեց ՀՀ-ում ԱՄՆ դեսպան Ջոն Հեֆերնը` հավելելով, որ որևէ նոր բան չի կարող ավելացնել երեկվա ասածին:
Հարցին` տեսնո՞ւմ է արդյոք քաղաքական որևէ դրդապատճառ կատարվածի մեջ, Ջ. Հեֆերնը կրկնեց, որ ուշադիր հետևում են իրադարձություններին և հուսով են` հետաքննությունը կկատարվի օրենքի շրջանակներում:
Հիշեցնենք, որ երեկ «Ազատություն» ռադիոկայանին դեսպանը մտահոգություն էր հայտնել` կապված քրգործի հարուցման ժամանակաշրջանի հետ, և կարևորել էր «Սիվիլիթաս» հիմնադրամը որպես գործընկեր։
Նշենք, որ ԱԱԾ քննչական վարչությունը մայիսի 25-ին հանցավոր ճանապարհով ստացված առանձնապես խոշոր չափերով եկամուտներն օրինականացնելու հատկանիշներով քրգործ էր հարուցել, որի հետ կապված շոշափվում է «Սիվիլիթաս» հիմնադրամի հիմնադիր, ՀՀ նախկին արտգործնախարար և «Բարգավաճ Հայաստան» խմբակցության պատգամավոր Վարդան Օսկանյանի անունը։
ԱՄՆ դեսպանը հետևում է «Սիվիլիթաս»-ի շուրջ իրադարձություններին:
